КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2022-жылдын 9-сентябры № 492

Баткен облусунун чек ара райондорунда турак жайлардын курулушу жөнүндө

"Баткен облусунун статусу жөнүндө" Кыргыз Республикасынын Мыйзамынын 4, 14-беренелерин ишке ашыруу максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. "Мамлекеттик ипотекалык компания" ачык акционердик коомуна (макулдашуу боюнча) төмөнкүлөр сунушталсын:

1) уставдык капиталдын каражаттарынан 200000000 (эки жүз миллион) сомду кийин сатып алуу механизми боюнча турак жайды андан ары ижарага берүү үчүн Баткен облусунун чек ара райондорунда турак жайлардын курулушун инвестициялоого жумшоо;

2) Кыргыз Республикасынын Министрлер Кабинетине караштуу Архитектура, курулуш жана турак жай коммуналдык-чарба мамлекеттик агенттиги менен кийин менчик укугун аныктоо менен Баткен облусунун чек ара райондорунда турак жайлардын курулушун инвестициялоо жөнүндө макулдашуу түзүү.

2. Баткен облусунун чек ара аймактарынын тургундары үчүн кийин сатып алуу механизми боюнча турак жайды ижарага берүүнүн шарттары ушул токтомдун тиркемесине ылайык бекитилсин.

3. Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги:

1) Баткен облусунун чек ара райондорунда турак жайлардын курулушунун "бирдиктүү заказчысы" катары чыксын;

2) "Мамлекеттик сатып алуулар жөнүндө" Кыргыз Республикасынын Мыйзамына ылайык Баткен облусунун чек ара райондорунда турак жайларды долбоорлоо жана куруу боюнча жумуштарды сатып алууну жүзөгө ашырсын.

4. Баткен облусун өнүктүрүү боюнча кеңеш:

1) турак жай фондун көбөйтүүгө муктаж болгон калктуу конуштарды аныктасын;

2) кийин сатып алуу механизми боюнча турак жайды ижарага алууга талапкер Баткен облусунун чек ара районунун тургундарынын тизмесин бекитсин.

5. Баткен облусунун жергиликтүү өз алдынча башкаруу органдарына төмөнкүлөр сунушталсын:

1) инженердик коммуникациялардын курулушун эсепке алуу менен турак жайларды куруу үчүн мыйзамдарда белгиленген тартипте жер участокторун бөлүп берүү;

2) Баткен облусун өнүктүрүү боюнча кеңештин кароосу жана бекитүүсү үчүн чек ара районунун тургундарынын тизмесин түзүү.

6. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

7. Бул токтом расмий жарыяланган күндөн тартып он күн өткөндөн кийин күчүнө кирет.

"Мамлекеттик ипотекалык компания" ачык акционердик коому (мындан ары - МИК) тарабынан Баткен облусунун чек ара аймактарынын тургундары үчүн кийин сатып алуу механизми боюнча турак жайды ижарага берүүнүн ШАРТТАРЫ