КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2023-жылдын 23-июну № 314

Кыргыз Республикасынын Министрлер Кабинетинин 2021-жылдын 24-декабрындагы № 338 "Кыргыз Республикасынын Жаратылыш ресурстары, экология жана техникалык көзөмөл министрлигинин ведомстволук бөлүмдөрүнүн маселелери жөнүндө" токтомуна өзгөртүүлөрдү киргизүү тууралуу

"Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Министрлер Кабинетинин 2021-жылдын 24-декабрындагы № 338 "Кыргыз Республикасынын Жаратылыш ресурстары, экология жана техникалык көзөмөл министрлигинин ведомстволук бөлүмдөрүнүн маселелери жөнүндө" токтомуна төмөнкүдөй өзгөртүүлөр киргизилсин:

жогоруда атаган токтом менен бекитилген Кыргыз Республикасынын Жаратылыш ресурстары, экология жана техникалык көзөмөл министрлигине караштуу Климаттык каржылоо борбору жөнүндө жободо:

- 8-пункттун экинчи абзацы "(мындан ары - ЖКФ)" деген сөздөрдөн кийин ", башка климаттык, экологиялык фонддордон" деген сөздөр менен толукталсын;

- 9-пунктта:

экинчи абзацтагы "климаттын өзгөрүүсү маселеси" деген сөздөр "климаттык долбоорлорду даярдоо, климаттык каржылоону тартуу маселелери жана климаттын өзгөрүүсүнө тиешелүү башка маселелер" деген сөздөргө алмаштырылсын;

төртүнчү абзац алып салынсын;

бешинчи абзац "ЖКФ" деген аббревиатурадан кийин ", башка климаттык, экологиялык фонддордон" деген сөздөр менен толукталсын;

- 10-пунктта:

бешинчи абзац "ЖКФтен" деген сөздөрдөн кийин ", башка эл аралык климаттык жана экологиялык фонддордон, эл аралык уюмдардан" деген сөздөр менен толукталсын;

он биринчи абзац "ЖКФ" деген аббревиатурадан кийин ", башка эл аралык климаттык, экологиялык фонддор" деген сөздөр менен толукталсын;

он үчүнчү абзац төмөнкүдөй редакцияда баяндалсын:

"Кыргыз Республикасынын уюмдарына жана мекемелерине ЖКФте, башка эл аралык климаттык жана экологиялык фонддордо аккредитациядан өтүүгө;";

- 11-пункт төмөнкүдөй мазмундагы он биринчи абзац менен толукталсын:

"- климаттык жана экологиялык долбоорлорду даярдоо маселелери боюнча аткаруу бийлигинин органдарынын ишин координациялайт;".

2. Бул токтом расмий жарыяланган күндөн тартып жети күн өткөндөн кийин күчүнө кирет.