Кыргыз Республикасынын

Айыл чарба министрлигинин

2023-жылдын 20-апрелиндеги

№ 154-ни буйругуна

тиркеме

Кыргыз Республикасынын жер фондуна инвентаризация жүргүзүү тартиби жөнүндө

Жобо

1. Жалпы жоболор

1. Бул жобо (мындан ары – Жобо) жер-кадастрдык маалыматтардын аныктыгын камсыз кылуу, менчигинин түрүнө карабастан, жер категориялары боюнча чарба жердин курамында болгон өзгөрүүлөрдү аныктоо жана пландык-картографиялык материалдарда чагылдыруу максатында иштелип чыкты.

Кыргыз Республикасынын территориясынын чегинде жайгашкан бардык жерлерге (мындан ары – жер фонду) инвентаризация жүргүзүлөт.

2. Жер фондун инвентаризациялоо Кыргыз Республикасынын Айыл чарба министрлигине караштуу Жер ресурстары кызматынын алдындагы “Кыргызмамжердолбоор” жерге жайгаштыруу мамлекеттик ишканасы (мындан ары – “Кыргызмамжердолбоорлоо” МИ) тарабынан жүргүзүлөт жана жыл сайын республикалык бюджетте каралган Кыргыз Республикасынын Айыл чарба министрлигинин учурдагы чыгымдарын бюджеттик каржылоонун чегинде республикалык бюджеттин каражаттарынын эсебинен каржылануучу бир жолку эсепке алуучу иш-чара болуп эсептелет. Ошондой эле инвентаризациялоо жергиликтүү өз алдынча башкаруу органдарынын же кызыктар болгон министрликтердин жана ведомстволордун, жер пайдалануучулардын (келишимдин негизинде)  демилгеси боюнча жайгашкан чек араларында болгон өзгөрүүлөрдүн топтолушуна, жер участокторун жана жерлердин пайдалануу мүнөзүнө жана абалына жараша, тиешелүү масштабдарда пландык-картографиялык негиздерин милдеттүү жаңыртуу, санариптик карталарды түзүү менен жүргүзүлөт.

Инвентаризациялоонун натыйжалары Кыргыз Республикасынын Жер кодексинин 106, 109-статьяларына ылайык келип чыккан өзгөртүүлөрдүн көлөмүн эске алуу менен жаңыланат.

3. Жер фондун инвентаризациялоонун максаты жердин жайгашкан жери, аянты, чек аралары, жер категориясы жөнүндө маалыматтарды камтыган жерлердин болушу жөнүндө маалыматтарды тактоо болуп саналат.

4. Райондун, анын ичинде айыл аймагынын аймагында жайгашкан жер фондун инвентаризациялоонун материалдарын жүргүзүү жана кароо үчүн райондук мамлекеттик администрациясы менен төмөнкү курамда комиссия түзүлөт: райондук мамлекеттик администрациянын башчысынын биринчи орун басары (комиссиянын төрагасы), «Кадастр» мамлекеттик мекемесинин (мындан ары – жергиликтүү каттоо органы) жергиликтүү филиалынын директору, райондун Токой кызматынын өкүлү, райондук суу чарба бөлүмүнүн начальниги, Кыргыз Республикасынын Айыл чарба министрлигинин райондук агрардык өнүктүрүү бөлүмүнүн башчысы, жергиликтүү бийликтин, Кыргыз Республикасынын Улуттук статистикалык комитетинин өкүлү, айыл өкмөт башчылары, «Кыргызмамжердолбоорлоо» мамлекеттик ишканасынын адистери.

Комиссиянын курамына кызыктар мамлекеттик кызматтардын өкүлдөрү кошумча киргизилиши мүмкүн.

5. Райондук комиссия:

1) жумушчу комиссия тарабынан түзүлгөн жер фондунун инвентаризациялоо материалдарын жана актыларын (ушул Жобонун 1-тиркемеси), салыштырма тизмени (ушул Жобонун 2-тиркемеси), ар бир айыл аймагы боюнча өзүнчө инвентаризациялоонун материалдарын же натыйжаларын (ушул Жобонун 3-тиркемеси), инвентаризациялоо материалдарын бекитүү жөнүндө айылдык кеңештин токтомун карап чыгып, ар бир айыл аймагы үчүн өзүнчө протокол түзөт;

2) тиешелүү райондун айыл аймактарынын жерлерин инвентаризациялоонун жыйынтыгын райондук мамлекеттик администрацияга бекитүү үчүн киргизет.

6. Айыл аймагында жана райондук маанидеги шаарларда айыл өкмөтүнүн башчысынын (шаардын мэринин) чечими менен жер фондуна инвентаризация жүргүзүүгө практикалык жардам көрсөтүү үчүн жумушчу топ түзүлөт, анын курамына төмөнкүлөр кирет: айыл өкмөтүнүн башчысы (шаардын вице-мэри) (жумушчу топтун жетекчиси), жергиликтүү кеңештин депутаты, жергиликтүү каттоо органынын өкүлү, суу пайдалануучулар ассоциациясынын өкүлү, «Кыргызмамжердолбоорлоо» мамлекеттик ишканасынын адистери жана кызыктар кызматтардын өкүлдөрү.

Жумушчу топ айыл аймагынын жана райондук маанидеги шаарлардын административдик чектеринде жер фондун инвентаризациялоо боюнча иштердин бардык комплексин ишке ашырууга практикалык жардам көрсөтөт.

7. Республикалык жана облустук маанидеги шаарлардын жер фондун инвентаризациялоонун материалдарын кароо үчүн шаардын мэриясы тарабынан төмөнкү курамдагы шаардык комиссия түзүлөт:

– шаардын биринчи вице-мэри (комиссиянын төрагасы), жергиликтүү каттоо органынын начальниги, райондук суу чарба башкармалыгынын начальниги, Кыргыз Республикасынын Улуттук статистикалык комитетинин шаардык органынын өкүлү, “Кыргызмамжердолбоорлоо” Мамлекеттик ишканасынын адистери, ошондой эле жерди пайдалануучулардын өкүлдөрү, ошондой эле ижарачылар (иш алардын демилгеси боюнча жүргүзүлгөн учурда).

8. Шаардык комиссия:

8.1 Жумушчу топ (комиссия) тарабынан түзүлгөн жер фондун инвентаризациялоо актысын (1-тиркеме), салыштырма ведомосту (2-тиркеме), шаардын мэриясынын чечимин карайт жана протокол түзөт (3-тиркеме).

8.2 Белгиленген отчеттук формага ылайык жерлерди инвентаризациялоонун жыйынтыгын мэриянын бекитүүсүнө берет.

8.3 Инвентаризация жүргүзүү мезгилинде төмөнкү функцияларды аткарат жерлерди инвентаризациялоо боюнча уюштуруу маселелерин чечүү; жергиликтүү каттоо органынын тиешелүү кызматкерлеринин катышуусун камсыз кылуу; жер фондусунун аянты боюнча иш жүзүндөгү маалыматтар менен жер отчетунун маалыматтарынын ортосундагы айырмачылыктар боюнча корутундуларды берүү; ирригациялык системалардын чек араларын жана сугат жерлерин пландоо, картографиялык материалга түшүрүү үчүн шаардын сугат жерлеринин аянттары боюнча зарыл маалыматтарды берүү.

9. “Кыргызмамжердолбоорлоо” МИ жер фондун инвентаризациялоо боюнча жумуштардын техникалык аткаруучусу болуп саналат. “Кыргызмамжердолбоорлоо” МИ инвентаризация жүргүзүү мезгилинде мөөнөтүндө учурдагы бюджет боюнча берилген бюджеттик каражаттардын көлөмүнүн чегинде адистерди ишке тартууга укуктуу.

10. Токой фондунун жерлерин жана өзгөчө корголуучу жаратылыш аймактарынын жерлерин инвентаризациялоодо алардын жалпы аянты жана тышкы чек аралары жөнүндө маалыматтар Кыргыз Республикасынын Айыл чарба министрлигине караштуу Жер ресурстарынын “Кыргызмамжердолбоорлоо” МИ жана жергиликтүү каттоо органынын, Кыргыз Республикасынын Айыл чарба министрлигине караштуу Токой кызматынын, токой чарба ишканаларынын, коруктардын, жаратылыш парктарынын маалыматтары боюнча алынат.

2. Жер фондун инвентаризациялоо

11. Жер фондун инвентаризациялоо боюнча жумуштар төмөнкү иретте аткарылат: даярдоо иштери, жерлерди талаалык изилдөө, камералык жумуштар, инвентаризациялоонун жыйынтыктары боюнча материалдарды кароо жана бекитүү.

12. “Кыргызмамжердолбоорлоо” МИнын адистери жергиликтүү каттоо органынын адистери тарабынан практикалык жардам көрсөтүлгөн учурда иштин төмөнкү түрлөрүн аткарышат:

а) акыркы жылдардагы фонддук пландык-картографиялык сүрөткө тартуу материалдарын тандоо жана изилдөө;

б) жерлер жана анын категориялары боюнча жер фонду жана анын бөлүштүрүлүшү жөнүндө маалыматтарды изилдөө (өткөн жылдын 1-январына карата абал боюнча);

в) “Кыргызмамжердолбоорлоо” МИнын жана “Кадастр” мамлекеттик мекемесинин филиалдарынын архивдик материалдарын изилдөө;

г) өткөн жылдардагы жерлерди, сугат тармактары бар жерлерди жана сугат жерлерин инвентаризациялоо материалдарын изилдөө;

д) аянттарды жер участогунун маалыматтары менен салыштыруу;

е) 1:500, 1:2000, 1:5000, 1:10000, 1:25000 жана 1:50000 масштабындагы фотокарталарды сканерлөө жана санариптештирүү, алар жок болгон учурда айыл аймактарынын жер пайдалануунун электрондук картасын түзүү;

ж) чек араларды инструменталдык сүрөткө тартуу талап кылынган аймактарда пландоо материалдарын даярдоо.

13. Колдо болгон пландык-картографиялык материалдарды изилдөөнүн натыйжасында алардын жер фондуна инвентаризациялоо жүргүзүүгө ылайыктуулугунун даражасы, инструменталдык изилдөөлөрдү же оңдоо иштерин жүргүзүү зарылдыгы жана көлөмү аныкталат.

14. Айыл аймагынын (шаардын) административдик чектериндеги бардык жерлерге алардын иш жүзүндөгү абалына ылайык талаа изилдөөсү жүргүзүлөт. Экспертиза ушул Жобонун 6-пунктунда көрсөтүлгөн жумушчу топ тарабынан жүргүзүлөт.

15. Чек аралардагы жана рельефтик кырдаалдын башка элементтериндеги өзгөрүүлөрдү аныктоо (пландык негизде колдонуу) үчүн талаалык интерпретациялоо методдору, инструменталдык жана жарым инструменталдык изилдөөлөр (сызыктуу жана бурчтук өлчөөлөр, тахеометриялык сүрөткө тартуу жана башкалар), ошондой эле 0,1 гектардан ашпаган контурдун аянтын аныктоонун тактыгын камсыз кылган космостук изилдөөлөрдүн материалдарын колдонсо болот.

16. Жумушчу топ талаа изилдөөсүнүн жыйынтыгы боюнча жер фондун инвентаризациялоо актысын түзөт, иш жүзүндөгү чек аралардагы жерлердин категориялары боюнча жерлердин аянттарынын салыштырма ведомостун жана жерлердин аянттары жөнүндө маалыматтарда дал келбестиктердин себептери жөнүндө түшүндүрмө кат даярдайт. Ошондой эле жумушчу топ жердин түрлөрүн, ошондой эле Айыл чарба жерлеринин мамлекеттик фондунун (АЧЖМФ) жерлерине тиешелүү контурларын аныктайт;

Камералык жумуштар.

17. Географиялык маалымат системаларынын (ГИС) стандарттык продукциясына ылайык даярдоо жана талаа жумуштарынан кийин такталган контурлар жана алардын чек аралары, ошондой эле рельефтин өзгөргөн элементтери пландуу негизге киргизилет.

18. Фотопландарда жер участокторунун жалпы аянттары (алардын чектерин өзгөртүү менен) жана жердин контурларынын өзгөртүлгөн аянттары эсептелет жана такталат.

Өзгөртүлгөн контурлардын эсептелген аянттары мурда эсептелгендер менен байланыштырылып, жерлердин инвентаризациясынын ведомосту түзүлөт.

19. Электрондук картографиялык материалды түзүү менен компьютердик иштеп чыгуу (ГИС иши):

а) санариптештирүү (векторизация);

б) сканерленген материалдарды тазалоо жана планшеттерди бириктирүү;

в) айыл аймагынын жерди пайдалануу планындагы тартуу маалыматтары боюнча участоктордун, жерлердин чек араларын оңдоо;

г) сүрөттөгү маалымат боюнча жер фондусунун аянттарын тактоо –  айыл аймагынын (шаардын) жерди пайдалануу картасын түзүү жана аны басып чыгаруу.

20. Жерди инвентаризациялоонун материалдары айыл өкмөтү тарабынан каралат жана белгиленген отчеттук формага ылайык айылдык кеңештин жана айыл өкмөтүнүн (райондук маанидеги шаардын мэриясынын) токтому менен бекитилет. Бардык инвентаризациялык материалдар райондук комиссиянын кароосуна жиберилет. Райондук комиссия инвентаризациялык материалдарды карап чыгып протокол түзөт, андан кийин райондук мамлекеттик администрациянын чечими менен бекитилет, андан кийин иш бүттү деп эсептелет.

Облустук маанидеги шаарлардын деңгээлинде жер фондунун инвентаризация материалдары шаардын мэриясынын чечими менен бекитилет. Республикалык маанидеги шаарлардын деңгээлинде жер фондунун инвентаризация материалдары шаардын мэриясынын чечими менен бекитилет.

21. Ар бир айылдык аймак (шаар) боюнча төмөнкү документтерди камтыган материалдар (өзүнчө дело) түзүлөт.

– райондун айыл аймактары боюнча жер фондуна инвентаризация жүргүзүү боюнча райондук комиссия түзүү жөнүндө райондук мамлекеттик администрациясынын айыл аймактарынын башчысынын чечими;

– айыл аймагынын (райондук маанидеги шаардын) жер фондуна инвентаризация жүргүзүү боюнча жумушчу топту түзүү жөнүндө айыл өкмөтүнүн башчысынын (шаардын мэринин) чечими;

– шаардын жер фондуна инвентаризация жүргүзүү боюнча шаардык комиссия түзүү жөнүндө республикалык жана райондук маанидеги шаардын мэриясынын токтому;

– жерлердин контурлары жана аянттары да көрсөтүлгөн, жер пайдалануунун иш жүзүндөгү чектери жазылган айылдык аймактын (шаардын) жер фондунун картографиялык планы;

– жер фондунун бар экендиги жөнүндө (өткөн жылдын 1-январына карата маалыматтар боюнча) жергиликтүү каттоо органынын отчеттун белгиленген формасы боюнча расмий документи (маалымкат);

– айыл аймагында (шаарда) сугат жерлердин бар экендиги жөнүндө райондук суу чарба башкармалыгынын расмий документи (справкасы);

– айыл аймагынын (шаардын) жер фондунун инвентаризациясынын ведомосту;

– салыштырма ведомосту – эсепке алуу маалыматтары менен жер фондун инвентаризациялоонун жыйынтыктарынын ортосундагы айырма отчеттун белгиленген формасы боюнча түзүлөт;

– инвентаризациялоо боюнча жумушчу топтун (комиссиянын) актысы;

– жер фондун инвентаризациялоонун жыйынтыгын бекитүү жөнүндө айылдык кеңештин токтому;

– жергиликтүү мамлекеттик администрациянын буйругу менен түзүлүүчү райондук комиссиянын протоколу, ал ар бир айыл аймак (райондук маанидеги шаар) боюнча өзүнчө түзүлөт;

– республикалык жана райондук маанидеги шаардын мэриясынын буйругу менен түзүлүүчү шаардык комиссиянын протоколу;

– жер фондун инвентаризациялоонун жыйынтыгын бекитүү жөнүндө райондук мамлекеттик администрациянын токтому;

– жер фондун инвентаризациялоонун жыйынтыгын бекитүү жөнүндө республикалык жана райондук маанидеги шаардын мэриясынын токтому;

– түшүндүрмө кат.

22. Жер фондунун инвентаризациясы бир нускада түзүлөт, ал “Кыргызмамжердолбоолоо” мамлекеттик ишканасынын архивинде сакталат. Инвентаризациялоо боюнча материалдардын электрондук версиясы pdf, jpeg форматында айыл өкмөттөрүнө (шаардын мэриясына) жана жергиликтүү каттоо органдарына жөнөтүлөт.

23. Жерди инвентаризациялоонун бекитилген материалдарынын жыйынтыгы боюнча Кыргыз Республикасынын Жер кодексинин 2-бөлүмүндө аныкталган ыйгарым укуктуу мамлекеттик органдар жана жергиликтүү өз алдынча башкаруу органдары жерди иш жүзүнө жана укуктук абалга келтирүү үчүн тийиштүү чараларды көрүүгө милдеттүү.

24. Жогоруда көрсөтүлгөн жер фондун инвентаризациялоо материалдары төмөнкү учурда аяктады деп эсептелет:

– райондор үчүн – райондук мамлекеттик администрациясынын токтому;

– шаарлар үчүн – шаардын мэриясынын чечими менен.

Жер фондун инвентаризациялоо материалдарын түзөтүү иштери (корректировка)

Айыл аймактарынын жерлеринин инвентаризация материалдарын түзөтүү иштери жерди пайдалануучулардын чек аралары жана жерлердин түрлөрү боюнча маалыматтар 30%га чейин өзгөргөндө жүргүзүлөт.

Түзөтүүдө айылдык аймактын жер фондунун өзгөрүлгөн бөлүгүндө гана ушул Жобонун бардык пункттары аткарылат.

Кыргыз Республикасынын

жер фондуна инвентаризация

жүргүзүү тартиби жөнүндөгү жобого

1-тиркеме

Форма

Жер фондуна инвентаризация жүргүзүү жөнүндө

АКТ

"__" _________20__-ж.

1. Бул акт _________ облусунун _________ районунун _________ айыл өкмөтүнүн (шаардын) башчысынын (мэрдин) 20__-жылдын "__" _______ № ____ буйругуна ылайык жер фондун инвентаризациялоо боюнча төмөнкү курамдагы жумушчу топ (комиссия) тарабынан түзүлдү:

жумушчу топтун (комиссиянын) жетекчиси:

жумушчу топтун (комиссиянын) мүчөлөрү:

20__-жылдын "__" ________ баштап 20__-жылдын "__" _______ чейин __________ облусунда __________ районунда __________ айыл аймагында (шаарында) талаага чыгып изилдөө жолу менен жалпы _________ гектар аянтында жер фондун инвентаризациялоо жүргүзүлдү.

2. Жерлерди инвентаризациялоо жыйынтыгы белгиленген форма боюнча түзүлгөн отчетто көрсөтүлдү:

3. Жумушчу топтун корутундусу жана сунушу:

____________________________________________________

____________________________________________________

____________________________________________________

Жумушчу топтун (комиссиянын) жетекчиси:

Топтун (комиссиянын) мүчөлөрү:

5. Бул акт үч нускада: 1 нуска айыл өкмөтү (шаардын мэриясы) үчүн, 1 нуска Кыргыз Республикасынын Айыл чарба министрлигинин "Кыргызмамжердолбоорлоо" жерге жайгаштыруу боюнча мамлекеттик ишканасы үчүн, 1 нуска райондук комиссия үчүн түзүлдү.

Кыргыз Республикасынын

жер фондуна инвентаризация

жүргүзүү тартиби жөнүндөгү жобого

2-тиркеме

______________ айыл аймагынын/ районунун салыштырма ведомосту

Жумушчу топтун (комиссиянын) жетекчиси:

                                                                         __________________________ (аты-жөнү)

_________________________(колу)

Жумушту топтун (комиссиянын) мүчөлөрү:

____________________________(аты-жөнү)

________________________(колу);

____________________________(аты-жөнү)

________________________(колу);

____________________________(аты-жөнү)

________________________ (колу);

____________________________(аты-жөнү)

_______________________ (колу).

Жумушчу топтун (комиссиянын) жетекчиси:

Жумушчу топтун (комиссиянын) мүчөлөрү:

Кыргыз Республикасынын

жер фондуна инвентаризация

жүргүзүү тартиби жөнүндөгү жобого

3-тиркеме

Форма

_________ облусунун ________ районунун (шаарынын) мамлекеттик администрация башчысынын (мэринин) 20__-жылдын "__" _______ № ___ чечими менен түзүлгөн райондук (шаардык) комиссиянын кеңешмесинин

ПРОТОКОЛУ

Катышкандар:

1. ___________ (аты-жөнү), ___________ районунун (шаарынын) мамлекеттик администрация башчысынын орун басары (вице-мэр), комиссиянын төрагасы;

2. ___________ (аты-жөнү), __________ райондук жерге жайгаштыруу жана кыймылсыз мүлккө укуктарды каттоо боюнча башкармалыгынын (бөлүмүнүн) башчысы;

3. ___________ (аты-жөнү), _________ райондук (облустук) суу чарба башкармалыгынын башчысы;

4. ___________ (аты-жөнү), Кыргыз Республикасынын Айыл чарба министрлигинин _______ райондук агрардык өнүктүрүү башкармалыгынын өкүлү;

5. ___________ (аты-жөнү), Кыргыз Республикасынын Улуттук статистика комитетинин ___________ райондук (шаардык) органынын өкүлү;

6.___________ (аты-жөнү), Кыргыз Республикасынын Өкмөтүнө караштуу Мамлекеттик салык кызматынын ___________ (аты-жөнү) райондук (шаардык) салык кызматынын өкүлү;

7. __________ (аты-жөнү), Кыргыз Республикасынын Айыл чарба министрлигинин "Кыргызмамжердолбоорлоо" жерге жайгаштыруу боюнча мамлекеттик ишканасынын адиси;

8. _________ (аты-жөнү), __________ айыл өкмөтүнүн башчысы;

9. _________ (аты-жөнү), __________ айыл өкмөтүнүн башчысы.

КҮН ТАРТИБИ:

___________ облусунун ___________ районунун (шаарынын) _______ айыл аймагынын жер фондун инвентаризациялоонун жыйынтыгы боюнча материалдарды кароо.

Угулду:

_________ облусунун ________ районунун (шаарынын) ________ айыл аймагынын жер фондун инвентаризациялоонун жыйынтыгы жөнүндө _________ (аты-жөнү) маалыматы.

Жер фондун инвентаризациялоонун жыйынтыгын карап жана талкуулап, комиссия төмөнкү чечимге келди:

1. _________ облусунун ________ районунун (шаарынын) ________ айыл аймагынын жер фондун инвентаризациялоонун жыйынтыгы боюнча сунушталган материалдар жактырылсын.

2. Район (шаар) боюнча бардык айыл аймактарда жүргүзүлгөн инвентаризациялоонун жыйынтыктары жалпылансын жана __________ райондук мамлекеттик администрацияга (шаардын мэриясына) кароого жана бекитүүгө берилсин.