КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2025-жылдын 24-сентябры № 830-т

Бюджеттин "жашыл" чыгымдарын маркалоо системасын киргизүү жана экология жана климат менен байланышкан маселелерди жана проблемаларды чечүүгө мамлекеттик чыгымдарды көзөмөлдөө, Кыргыз Республикасынын Президентинин 2025-жылдын 5-июнундагы № 178 "2030-жылга чейин Кыргыз Республикасын өнүктүрүүнүн улуттук программасы жөнүндө" Жарлыгын ишке ашыруу максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык:

1. Төмөнкүлөр бекитилсин:

1) Кыргыз Республикасынын бюджетинин "жашыл" чыгымдарын маркалоо боюнча убактылуу колдонмо 1-тиркемеге ылайык;

2) 2025-2027-жылдарга бюджеттин "жашыл" чыгымдарын маркалоону киргизүү боюнча жол картасы (мындан ары - Жол картасы) 2-тиркемеге ылайык.

2. Бюджеттин "жашыл" чыгымдарын маркалоо боюнча пилоттук долбоорунун экинчи этабынын катышуучулары катары төмөнкү мамлекеттик органдар аныкталсын:

1) Кыргыз Республикасынын Суу ресурстары, айыл чарба жана кайра иштетүү өнөр жайы министрлиги;

2) Кыргыз Республикасынын Энергетика министрлиги;

3) Кыргыз Республикасынын Финансы министрлиги (жалпы мамлекеттик программалар, иш-чаралар жана төлөмдөр);

4) Кыргыз Республикасынын Жаратылыш ресурстары, экология жана техникалык көзөмөл министрлиги;

5) Кыргыз Республикасынын Өзгөчө кырдаалдар министрлиги.

3. Пилоттук долбоорго тартылган мамлекеттик органдар:

1) Жол картасында каралган иш-чараларды белгиленген мөөнөттөрдө аткарууну камсыз кылсын;

2) жогоруда көрсөтүлгөн Убактылуу колдонмого ылайык бюджеттин "жашыл" чыгымдарын маркалоону жүзөгө ашырсын;

3) пилоттук долбоорду ишке ашыруунун жыйынтыгы боюнча Кыргыз Республикасынын Финансы министрлигине "жашыл" чыгымдарды маркалоо процессин өркүндөтүү боюнча сунуштарды берсин.

4. Кыргыз Республикасынын Финансы министрлиги:

1) Жол картасында каралган иш-чараларды ишке ашырууну координацияласын;

2) Кыргыз Республикасынын Экология, климаттын өзгөрүшү жана "жашыл" экономиканы өнүктүрүү маселелери боюнча координациялык кеңешине Жол картасынын иш-чараларын аткаруунун жүрүшү жөнүндө ар жылдык жыйынтыкталган маалыматты берүүнү камсыз кылсын;

3) зарыл болгон учурда ушул тескеменин 1-пунктунда көрсөтүлгөн Убактылуу колдонмону пилоттук долбоордун жыйынтыктарын эске алуу менен жеткире иштеп чыксын жана аны жаңылоону камсыз кылсын.

5. Жол картасында каралган иш-чаралардын өз убагында жана сапаттуу аткарылышы үчүн мамлекеттик органдардын жетекчилеринин жеке жоопкерчилиги белгиленсин.

6. Жол картасынын иш-чараларын каржылоо тийиштүү жылдарга республикалык бюджетте мамлекеттик органдарга каралган бюджеттик ассигнованиелердин чегинде, ошондой эле өнүктүрүү боюнча өнөктөштөрдүн каражаттарынын жана Кыргыз Республикасынын мыйзамдарында тыюу салынбаган башка булактардын эсебинен жүзөгө ашырылат деп аныкталсын.

7. Бул тескеменин аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

2025-2027-жылдарга бюджеттин "жашыл" чыгымдарын маркалоону киргизүү боюнча ЖОЛ КАРТАСЫ