КР Президентинин 2012-жылдын 25-июлундагы ПЖ № 140 Жарлыгына ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН ПРЕЗИДЕНТИ

ЖАРЛЫК

2009-жылдын 12-июну ПЖ №272

Кыргыз Республикасынын кен казып алуу тармагын башкарууну реформалоо боюнча кечикткрилгис чаралар жөнүндө

Кыргыз Республикасынын кен казып алуу өнөр жайынын ишине талдоо жүргүзүү пайдалуу кендер чыккан жерлерди өздөштүрүү жетишсиз деңгээлде экендигин көрсөттү.

Кен казып алуу жана кен-металлургия ишканалары тарабынан акыркы жылдары жетишилген өнөр жай продукциясын өндүрүү көрсөткүчтөрү негизинен алтын казып алуу тармагынын эсебинен алынган, анын көрсөткүчтөрү толугу менен Кумтөрдөгү алтын өндүрүшүнө жараша болот.

Өлкөнүн ресурстук базасында пайдаланууга даярдалган бир нече пайдалуу кендер чыккан жерлер бар. Бул кен чыккан жерлерди иштетүү кыска мөөнөттүү келечекте эле кыйла экономикалык көрсөткүчтөргө жетишүүгө алып келет.

Тармакты сапаттуу өнүктүрүүнү камсыз кылуу үчүн кен казып алуу тармагында олуттуу жана тездетилген реформа талап кылынат.

Кен казып алуу тармагын башкарууну реформалоодо төмөнкүлөрдү негизги багыт катары аныктоо сунуш кылынат:

- кен байлыктарын пайдалануу чөйрөсүндө колдонуудагы мыйзамдарды өркүндөтүүнүн жана жаңы ченемдик укуктук актыларды иштеп чыгуунун негизинде кен мыйзамдарынын бирдиктүү системасын түзүү;

- кен байлыктарын пайдалануу чөйрөсүндө, анын ичинде долбоорлорду лицензиялоодо, экспертизалоодо, мыйзамдардын аткарылышына мониторинг жүргүзүүдө жана алардын аткарылышын камсыз кылууда "жалгыз терезе" системасын киргизүү менен тармакты өнүктүрүүнүн бир борборун түзүү;

- пайдалуу кендер чыккан жерлердин Мамлекеттик резервин түзүү жана аларды кен байлыктарын пайдалануу боюнча мамлекеттик орган тарабынан башкаруу;

- геологиялык тармактын инфраструктурасын реформалоо;

- кен казып алуу тармагы үчүн жогорку квалификациялуу адистерди даярдоо системасын түзүү;

- тармактын жетишилген экономикалык натыйжаларына жараша кен казып алуу тармагын башкаруу системасын өнүктүрүү, мындай өнүктүрүүнү каржылоонун булагы катары бюджетке кен казып алуу ишканаларынын ишинен, конкурстарды жана аукциондорду өткөрүүдөн, лицензияны кармап алууга төлөмдөрдөн пландан тышкаркы түшүүчү каражаттардан 20% өлчөмүндө пландуу бюджеттик каражаттарды жана атайын каражаттарды кароо.

Кен казып алуу тармагын башкарууну реформалоодо төмөнкү принциптерди негиз кылып алуу сунуш кылынат:

- Кыргыз Республикасынын бүткүл элинин жыргалчылыгы үчүн кен байлыктарын колдонуу;

- кен бизнесин жүргүзүүнүн так, ачык-айкын эрежесин түзүү;

- жеке менчик укугу катары кен казып алуу тармагына инвестицияларды коргоо;

- кен долбоорлорунда менчик капитал тарабынан коммерциялык тобокелдиктерди өзүнө алуу;

- кен байлыктарын пайдалануу укугуна лицензияларды конкурстардын жана аукциондордун негизинде берүү, ал эми конкурстарда жана аукциондордо талап кылынбаган объекттерге карата алгачкы билдирме укугу боюнча;

- кен концессиясы же продукцияны бөлүштүрүү жөнүндө макулдашуу боюнча кен байлыктарын пайдалануучунун кен байлыктарын пайдалануу укугун жана лицензиясын соттун чечими боюнча гана чакыртып алуу;

- кен байлыктарын пайдаланууну экономикалык ыкмалар менен гана жөнгө салуу;

- пайдалуу кендер чыккан жерлерди издөөдөн иштетүүгө чейин лицензияларды трансформациялоого толук жана өзгөчө укук;

- кен байлыктарын пайдалануучунун кен байлыктарын пайдалануу тартибин өз алдынча тандоо укугу (лицензиянын, концессиялык келишимдин же продукцияны бөлүштүрүү жөнүндө макулдашуунун негизинде);

- концессия жөнүндө келишимдердин жана продукцияны бөлүштүрүү жөнүндө макулдашуулардын эл аралык соттуулугун аныктоо мүмкүндүгү;

- концессия укугун тескөө эркиндиги;

- концессияны берүүгө акы төлөө;

- мамлекеттик башкаруу органдарынын жана кен байлыктарын пайдалануучулардын өз ара жоопкерчилиги;

- кен байлыктарын пайдалануучулар тарабынан жерлерди тиешелүү түрдө рекультивациялоону өткөрүүнү кошкондо курчап турган чөйрөнү коргоону камсыз кылууга толук кепилдик берүү.

Кен казып алуу тармагында мамлекеттик башкаруу системасын өркүндөтүү үчүн шарттарды түзүү, тармакты бирдиктүү координациялоону камсыз кылуу максатында, Кыргыз Республикасынын Конституциясынын 42, 68, 71 жана 73-беренелерин, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 11-жана 12-беренелерин жетекчиликке алып токтом кылам:

1. Кыргыз Республикасынын Өкмөтүнө караштуу Геология жана минералдык ресурстар боюнча мамлекеттик агенттикти Кыргыз Республикасынын Өкмөтүнө караштуу Геология жана кен казып алуу өнөр жайы боюнча мамлекеттик агенттик кылып кайра уюштуруу максатка ылайыктуу деп эсептелсин, мында ага төмөнкү функциялар өткөрүп берилсин:

- Кыргыз Республикасынын Өнөр жай, энергетика жана отун ресурстары министрлигинен - отун ресурстары жагындагы мамлекеттик саясатты жүзөгө ашыруу;

- Кыргыз Республикасынын Өзгөчө кырдаалдар министрлигинен - лицензиялык аянттардын, кен жана жер бөлүгүнүн чектеринде кен байлыктарын геологиялык изилдөөдө жана пайдалуу кендер чыккан жерлерди иштетүүдө, пайдалуу кендерди казуу менен байланышпаган жер астындагы курулмаларды курууда (мунайды, газды жана башка заттар менен материалдарды сактоочу жерлер, жердин жылуулугун пайдалануу жана башка керектөөлөр үчүн) мамлекеттик кен көзөмөлүн жана өнөр жай коопсуздугуна көзөмөлдү уюштуруу жана ишке ашыруу;

- Кыргыз Республикасынын Өкмөтүнө караштуу Курчап турган чөйрөнү коргоо жана токой чарбасы боюнча мамлекеттик агенттиктен - лицензиялык аянттардын, кен жана жер бөлүгүнүн чектеринде кен байлыктарын геологиялык изилдөөдө жана пайдалуу кендер чыккан жерлерди иштетүүдө, пайдалуу кендерди казуу менен байланышпаган жер астындагы курулмаларды курууда (мунайды, газды жана башка заттар менен материалдарды сактоочу жерлер, жердин жылуулугун пайдалануу жана башка керектөөлөр үчүн) жаратылышты коргоону жана экологиялык мыйзамдарды сактоого мамлекеттик контролду уюштуруу жана ишке ашыруу;

2. Кыргыз Республикасынын Өкмөтү белгиленген тартипте:

- эки жумалык мөөнөттө:

мыйзам актыларына ушул Жарлыктын 1-пунктунан келип чыгуучу өзгөртүүлөрдү жана толуктоолорду киргизүү жөнүндө тиешелүү долбоорлорду иштеп чыксын жана Кыргыз Республикасынын Жогорку Кеңешинин кароосуна киргизсин;

- эки айлык мөөнөттө:

Кыргыз Республикасынын Өкмөтүнө караштуу Геология жана кен казып алуу өнөр жайы боюнча мамлекеттик агенттик жөнүндө жобону бекитсин, мында кен байлыктарын геологиялык изилдөө жана минералдык-чийки зат ресурстарын казып алуу жана кайра иштетүү боюнча ишканалардын ишин жөнгө салуу анын негизги функциясы катары аныкталсын;

курамында Геологиялык маалымат борборунун ишин кароо менен Кыргыз Республикасынын Өкмөтүнө караштуу Геология жана кен казып алуу өнөр жайы боюнча мамлекеттик агенттикти башкаруу схемасын бекитсин;

функцияларды кайра бөлүштүрүүнү жана Кыргыз Республикасынын Өнөр жай, энергетика жана отун ресурстары министрлигинен, Кыргыз Республикасынын Өзгөчө кырдаалдар министрлигинен, Кыргыз Республикасынын Өкмөтүнө караштуу Курчап турган чөйрөнү коргоо жана токой чарбасы боюнча мамлекеттик агенттиктен штаттык бирдиктерди жана айлык акы фондун өткөрүп берүүнү эске алып, Кыргыз Республикасынын Өкмөтүнө караштуу Геология жана кен казып алуу өнөр жайы боюнча мамлекеттик агенттиктин штаттык санын бекитсин;

Кыргыз Республикасынын Президентинин актыларын кошкондо, ушул Жарлыктан келип чыгуучу Кыргыз Республикасынын мыйзам актыларына жана ченемдик укуктук актыларына өзгөртүүлөрдү жана толуктоолорду киргизүү жөнүндө тиешелүү сунуштарды даярдасын, өз чечимдерин ушул Жарлыкка ылайык келтирсин;

чет өлкөлүк расмий документтерди мыйзамдаштыруу талабын жокко чыгаруучу 1961-жылдын 5-октябрындагы Гаага конвенциясына Кыргыз Республикасынын кошулушу боюнча бардык зарыл болгон жол-жоболорду өткөрсүн.

3. Кыргыз Республикасынын Өкмөтүнө караштуу Геология жана минералдык ресурстар боюнча мамлекеттик агенттик ушул Жарлыктын 1- жана 2-тиркемелерине ылайык Кыргыз Республикасынын Өкмөтү менен макулдашуу боюнча мыйзамдардын жана башка ченемдик укуктук актылардын долбоорлорун иштеп чыксын жана белгиленген мөөнөттө Кыргыз Республикасынын Президентинин кароосуна киргизсин.

4. Бул Жарлыктын аткарылышына контролдук кылуу милдети Кыргыз Республикасынын Президентинин Администрациясынын экономикалык жана социалдык саясат бөлүмүнө жүктөлсүн.

5. Бул Жарлык кол коюлган күндөн тартып күчүнө кирет.

Кен казып алуу тармагын башкарууну реформалоонун алкагында 2009-жылдын II-IV кварталында демилге кылына турган биринчи кезектеги мыйзамдардын долбоорлорунун жана башка ченемдик укуктук актылардын

ТИЗМЕСИ

Кен казып алуу тармагын башкарууну реформалоонун алкагында 2009-жылдын IV кварталында - 2010-жылдын II кварталында демилге кылына турган мыйзамдардын долбоорлорунун жана башка ченемдик укуктук актылардын

ТИЗМЕСИ