КР Министрлер Кабинетинин 2026-жылдын 20-июлундагы № 498 токтомуна ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2011-жылдын 6-июнундагы № 288

Өсүмдүктөр дүйнөсүнүн объекттерин (анын ичинде илимий максаттарда) алып коюуга атайын уруксат берүү тартиби жөнүндө  жобону жана Кыргыз Республикасында дары-дармек, тамак-аш өсүмдүктөрүн жана козу карындарды даярдоо жана жыйноо эрежелери жөнүндө жобону бекитүү тууралуу

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

"Кыргыз Республикасында өсүмдүктөр дүйнөсүн пайдалануу жана коргоо жөнүндө" Кыргыз Республикасынын Мыйзамынын 7-беренесине жана "Айлана-чөйрөнү коргоо жөнүндө" Кыргыз Республикасынын Мыйзамынын 15-беренесине ылайык Кыргыз Республикасынын Өкмөтү

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

ТОКТОМ КЫЛАТ:

1. Төмөнкү тиркелгендер бекитилсин:

- Өсүмдүктөр дүйнөсүнүн объекттерин (анын ичинде илимий максаттарда) алып коюуга атайын уруксат берүү тартиби жөнүндө жобо;

Атайын уруксат боюнча гана жүргүзүлүүчү чарбалык, коммерциялык жана башка илимий максаттарда жаратылыш чөйрөсүнөн (жеке менчикте болгон жерлерден башка) алып коюлуучу жапайы өсүмдүктөрдүн, алардык бөлүктөрүнүн жана азыктарынын (мөмө-жемиштер) түрлөрүнүн тизмеси;

- Өсүмдүктөр дүйнөсүнүн объекттерин (анын ичинде илимий максаттарда) алып коюуга атайын уруксаттын бирдиктүү формасы;

- Кыргыз Республикасында дары-дармек, тамак-аш өсүмдүктөрүн жана козу карындарды даярдоо жана жыйноо эрежелери.

2. Бул токтом расмий жарыяланган күндөн тартып күчүнө кирет.

3. Бул токтомдун аткарылышын контролдоо Кыргыз Республикасынын Өкмөтүнүн Аппаратынын агроөнөр жай комплекси жана жаратылышты пайдалануу бөлүмүнө жүктөлсүн.

Өсүмдүктөр дүйнөсүнүн объекттерин (анын ичинде илимий максаттарда) алып коюуга  атайын уруксат берүү тартиби жөнүндө

Жобо

 (КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

Бул Жобо өсүмдүктөр дүйнөсүнүн объекттерин жаратылышта пайдалануу тармагындагы укуктук мамилелерди белгилейт жана Кыргыз Республикасынын Конституциясынын жоболоруна, "Айлана-чөйрөнү коргоо жөнүндө", "Өсүмдүктөр дүйнөсүн коргоо жана пайдалануу жөнүндө" Кыргыз Республикасынын мыйзамдарына негизделет.

1. Өсүмдүктөр дүйнөсүнүн объекттерин пайдалануу принциптери

1.1. Кыргыз Республикасынын мамлекеттик токой фондусунун жерлеринде жаратылыш пайдалануу чөйрөсүндө пайда болуучу укуктук мамилелер мамлекеттик токой фонду жөнүндө нормативдик актыларга карама-каршы келбеген бөлүгүндө ушул Жобо менен жөнгө салынат.

1.2. Өсүмдүктөр дүйнөсүнүн объекттерин пайдалануу укугу акы төлөөнүн негизинде берилет. Мамлекеттик же муниципалдык менчиктеги өсүмдүктөр дүйнөсүнүн жаратылыш объекттерин пайдалангандыгы үчүн акы төлөөнүн ставкасы Кыргыз Республикасынын Өкмөтү тарабынан аныкталат.

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

1.3. Акы алуу тартиби Кыргыз Республикасынын Өкмөтү тарабынан ылайык аныкталат.

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

1.4. Жеке менчиктеги же менчиктин жеке формасында негизделген жеке жактардын же юридикалык жактардын (ижара акысында) пайдалануудагы өсүмдүктөрдүн дүйнөсүнүн объекттерин пайдалануу үчүн акы алуунун өлчөмдөрү жана формалары жер участогунун ээси (пайдалануучу) менен өсүмдүктөр дүйнөсүнүн объекттерин пайдаланууну жүргүзүүгө ниеттенген адамдын ортосундагы жарандык-укуктук келишимдин шарттарында аныкталат.

1.5. Чарбалык, коммерциялык жана башка максаттарда жаратылыш чөйрөсүнөн жапайы өсүмдүктөрдүн запастары, алардын бөлүктөрү жана продуктуларын (мөмө-жемиштерин) алып коюу уруксаттар боюнча гана жүргүзүлөт, алар Кыргыз Республикасынын Улуттук илимдер академиясы, алардын бөлүмчөлөрү, бөлүмдөрү же болбосо башка адистештирилген илимий уюмдар жүргүзүүчү жыл сайынкы мониторингдин жыйынтыгынын негизинде аныкталат.

1.6. Уруксатты берүүдө ыйгарым укуктуу орган адистештирилген илимий уюм жүргүзгөн жана берген жыл сайынкы мониторингдин жыйынтыгын эске алууга милдеттүү.

1.7. Айлана-чөйрөнү коргоонун республикалык мамлекеттик органы тарабынан жыл сайын мамлекеттик, муниципалдык, жеке менчиктеги же болбосо пайдалануучулардын ар кандай түрлөрүнө пайдаланууга берилген жерлерге Кыргыз Республикасынын Улуттук илимдер академиясы менен макулдашуу боюнча Экспорттоо лицензия боюнча ишке ашырылуучу өзгөчө товарлардын тизмесине киргизилген өсүмдүктөрдүн түрлөрүн алып коюуга жалпы лимит белгиленет. Өсүмдүктөрдүн калган түрлөрүн алып коюу белгиленген нормаларга, эрежелерге жана мөөнөттөргө ылайык белгиленген тартипте жүргүзүлөт.

2. Мамлекеттик же муниципалдык (коммуналдык) менчикке таандык болгон жана алып коюу уруксат боюнча гана жүргүзүлүүчү жапайы өсүмдүктөрдүн түрлөрүнүн тизмесине кирген өсүмдүктөр дүйнөсүнүн объекттерин пайдаланууга укук алуу

2.1. Өсүмдүктөр дүйнөсүнүн жаратылыш объекттерин пайдалануу укугун юридикалык жана жеке, анын ичинде чет өлкөлүк жактар алуусу мүмкүн.

2.2. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксат жаратылыш пайдаланууну уруксатта көрсөтүлгөн көлөмдө жүргүзүү үчүн керектүү болгон уруксат берүүчү документ болуп саналат. Башка мамлекеттик жана муниципалдык органдар өсүмдүктөр дүйнөсүнүн объекттерин, анын ичинде илимий максаттарда алып коюуга уруксатты алган адамдан өсүмдүктөр дүйнөсүнүн объекттерин, анын ичинде Кыргыз Республикасынын мамлекеттик токой фондусунун жерлеринде жаратылыш пайдаланууну кошпогондо, жайыттардын категориясына караштуу жерлерди алып коюуга кошумча акы төлөөгө же кошумча уруксат берүүчү документтерди талап кылууга укуктуу эмес.

2.3. Белгиленген формадагы уруксатты берүү ишканалардын, уюмдардын жана башка юридикалык жактардын жазуу жүзүндөгү арызына ылайык, ал эми жарандар үчүн - алардын арызы боюнча арыз берилген учурдан тартып беш жумуш күнүнүн ичинде жүргүзүлөт. Арыз берүүчү берген маалыматты текшерүү зарыл болгон учурда уруксат берүү мөөнөтү узартылышы мүмкүн, бирок он жумуш күнүнөн ашпайт.

2.4. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксатты алууга билдирме (арыздар) айлана-чөйрөнү коргоонун мамлекеттик органына берилет. Арыз берүүчү айлана-чөйрөнү коргоонун борбордук органына, ошондой эле айлана-чөйрөнү коргоонун аймактык органына кайрылууга укуктуу. Борбордук органдан уруксат алынган учурда, мындай уруксат жаратылышты пайдалануунун башталышына чейин өсүмдүктөр дүйнөсүнүн объекттерин пайдаланууну жүргүзүү жери боюнча аймактык органда катталууга тийиш.

2.5. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксатты алууга билдирмеде (арыздарда) төмөнкүлөр көрсөтүлүүгө тийиш:

- билдирме берүүчүнүн толук аталышы, дареги (юридикалык жак үчүн), аты-жөнү жана жашаган жери (жеке жак үчүн);

- түрлөр боюнча өсүмдүк ресурстарынын даярдалышынын болжолдуу көлөмү;

- өсүмдүк ресурстарын даярдоонун же башка түрлөрүн пайдалануунун болжолдуу мөөнөтү;

- даярдоо жүргүзүлүүчү аймак (облус, район, айылдык округ, капчыгай);

- даярдоо жолу (чабуу, жыйноо ж.б.у.с).

Билдирмеге (арызга) төмөнкү документтер тиркелет:

- Кыргыз Республикасынын Юстиция министрлигин органдарында (юридикалык жак үчүн), мамлекеттик статистика органдарында (жеке жак үчүн) мамлекеттик катталганын тастыктоочу документтин көчүрмөсү;

- билдирме берүүчүнүн мамлекеттик катталган жери боюнча салык органдарында билдирме берүүчүнүн катталганын тастыктоочу документтин көчүрмөсү (ИННдин көчүрмөсү же ИННди көрсөтүү менен салык органдарынан маалымкат);

- жаратылыш пайдаланууга төлөмдү тастыктоочу документтин көчүрмөсү.

Билдирме берүүчү документтерди мамлекеттик же расмий тилде берет.

Билдирме берүүчү берилген маалыматтардын жана документтердин аныктыгына жеке жоопкерчилик тартат.

2.6. Уруксат бир айдан бир жылга чейинки мөөнөткө берилет. уруксатты колдонуу мөөнөтү өсүмдүктөр дүйнөсүнүн объекттерин пайдалануу укугуна уруксат алууну каалаган жактын билдирмеси менен аныкталат.

2.7. Бир аймакта өсүмдүктөр дүйнөсүнүн объекттерин пайдаланууга бир нече билдирме келген учурда, билдирмелерде көрсөтүлгөн көлөмдөрдө бардык билдирмелерди канааттандыруу мүмкүн болбогондо уруксат жакка (адамга) билдирменин түшкөн күнү боюнча аныкталуучу кезек тартибинде берилет. Артыкчылык эртерээк мөөнөттө билдирмени берген билдирме берүүчүгө берилет.

2.8. Билдирме берүүчү жакка уруксат берүүдөн баш тартылышы мүмкүн. Анын колдонулуу мөөнөтү объективдүү себептер болгондо уруксат алууга арыз берген жакка ушул уруксатты берүүчү орган тарабынан баш тартууну (чектөөнүн себебин) жазуу жүзүндө негиздөө менен ушул уруксатты берген орган тарабынан азайтылышы же билдирилген көлөмдөрүнүн азайтылышы мүмкүн.

Уруксатты берүүдө баш тартуу үчүн негиз болуп төмөнкүлөр эсептелет:

- билдирме берүүчүгө карата, ага аталган иштин түрү менен иштөөгө тыюу салуучу соттун чечиминин бар болушу;

- ушул Жобонун 2.5-пунктунда көрсөтүлгөн документтерди бербөө же туура эмес таризделиши;

- жаратылышты пайдалангандыгы үчүн акы төлөбөө;

- билдирме берүүчүнүн анык эмес маалыматтарды бериши.

Уруксат берүүдө баш тартуу жөнүндө чечим жүйөлүү болууга жана 10 күндүн ичинде жазуу жүзүндө билдирме берүүчүгө билдирилүүгө тийиш. Жогоруда аталган тоскоолдуктарды билдирме берүүчү четтеткен учурда билдирме жалпы негизде каралат.

2.9. Уруксат берүүдөн баш тартуу, уруксатты колдонуунун мөөнөтүн чектөө же даярдоо (жыйноо) көлөмүн чектөө административдик иштин негиздери жана административдик жол-жоболор жаатындагы мыйзамдарга ылайык арызданылышы мүмкүн. Сот уруксат берүүдөн баш тартууну, уруксатты колдонуунун мөөнөтүн чектөөнү же даярдоо (жыйноо) көлөмүн чектөөнү тааныган учурда уруксат үчүн кайрылган жак Кыргыз Республикасынын жарандык мыйзамдарында белгиленген тартипте толук көлөмдө зыяндардын ордун толтурууну талап кылууга укуктуу.

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

2.10. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксат мыйзамдарда белгиленген тартипте жер участогун бөлүүнү кошпогондо, аталган объекттер жайгашкан жер участогун пайдаланууга укук бербейт.

2.11. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксат алган жак даярдалуучу сырьенун түрү жана саны жөнүндө өзгөрүүлөрдү уруксатка киргизүү үчүн ыйгарым укуктуу мамлекеттик органга кайрылууга укуктуу.

2.12. Өсүмдүктөр дүйнөсүнүн объекттерин, анын ичинде илимий максаттарда алып коюуга уруксатты алган жак жаратылышты пайдалануу процессинде уруксатта аныкталган пайдалануу укугу Кыргыз Республикасынын нормативдик укуктук актыларында белгиленген өсүмдүктөр дүйнөсүнүн объекттерин пайдаланууга жол берилген укуктан жогору экенин аныктаса, мындай жак Кыргыз Республикасынын нормативдик укуктук актыларынын талаптарын жетекчиликке алууга милдеттүү.

2.13. Уруксатты жокко чыгаруу аны берген орган тарабынан төмөнкүдөй учурларда жүргүзүлүшү мүмкүн:

- пайдалануунун мөөнөтү өтүп кеткен болсо;

- мамлекеттик же коомдук муктаждыктар үчүн жер алынса;

- пайдаланууда нормаларды, мөөнөттөрдү, даярдоо эрежелерин жана өсүмдүктөрдүн абалынын начарлашына же жок болуусуна алып келүүчү башка аракеттер жүргүзүлсө;

- пайдалануудан өз ыктыяры менен баш тартса жана Кыргыз Республикасынын мыйзамдарында каралган башка учурларда.

3. Алып коюуга уруксат боюнча гана жол берилген жана жеке менчикке таандык болгон же пайдалануудагы (ижара укугундагы) жапайы өсүмдүктүн түрлөрүнүн тизмесине киргизилген өсүмдүктөр дүйнөсүнүн объекттерин пайдалануу укугун алуу

3.1. Жеке менчиктеги же жарандардын же мамлекеттик эмес юридикалык жактардын пайдалануусундагы (ижара укугунда) өсүмдүктөр дүйнөсүнүн объекттерин пайдалануу укугун алуу жер участогунун менчик ээлери (пайдалануучулары) менен ошол жер участкаларында жайгашкан өсүмдүктөр дүйнөсүнүн объекттерин пайдалануу укугун алууга талапкер жактардын ортосунда жарандык укуктук келишимдерди түзүү жолу менен жүргүзүлөт.

3.2. Жеке менчиктеги же жарандардын же мамлекеттик эмес юридикалык жактардын пайдалануусундагы (ижара укугунда) өсүмдүктөр дүйнөсүнүн объекттерин пайдаланууда өсүмдүктөр дүйнөсүнүн объекттерин пайдалангандыгы үчүн белгиленген тарифтер боюнча акы ыйгарым укуктуу мамлекеттик орган тарабынан алынбайт.

3.3. Жеке менчиктеги же жарандардын же мамлекеттик эмес юридикалык жактардын пайдалануусундагы (ижара укугунда) өсүмдүктөр дүйнөсүнүн объекттерин пайдаланууда жыйноо (даярдоо) фактысын тастыктоочу документ тиешелүү жергиликтүү өз алдынча башкаруу органы тарабынан маалымкат формасында берилет.

3.4. Өсүмдүктөрдүн табигый ресурстарын коргоо жана калыбына келтирүү, алардын өсүү чөйрөсүн коргоо жана белгиленген эрежелерди, мөөнөттөрдү, лимиттерди жана нормативдерди сактоо боюнча чаралар системасы менен байланышкан иш-чаралар жер участогунун ээсинин (пайдалануучунун) эсебинен жүргүзүлөт.

4. Контролдоо

4.1. Мамлекеттик жана муниципалдык (коммуналдык) менчиктеги, ошондой эле жеке менчиктеги өсүмдүктөр дүйнөсүнүн объекттерин пайдалануу боюнча мыйзамдардын талаптарынын аткарылышы үчүн контролду айлана-чөйрөнү коргоонун ыйгарым укуктуу мамлекеттик органы ишке ашырат.

Уруксат боюнча гана жүргүзүлүүчү чарбалык, коммерциялык жана башка илимий максаттарда жаратылыш чөйрөсүнөн (жеке менчикте болгон жерлерден башка) алып коюлуучу жапайы өсүмдүктөрдүн, алардын бөлүктөрүнүн жана азыктарынын (мөмө-жемиштер) түрлөрүнүн ТИЗМЕСИ

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)

1. Дары-дармек өсүмдүктөрү

1.1. Уу коргошун - Aсоnitum leucostomum;

1.2. Жунгар уу коргошуну - Асоnitum songoricum;

1.3. Дарылык алтей - Althaea officinalis;

1.4. Кайың - Веtula pendula;

1.5. Долоно (Кызыл китепке кирген түрлөрдөн башкасы) - Сrataegus;

1.6. Түркстан валерианасы - Valeriana turkestanika;

1.7. Уйгак - Тhalictrum foetidum;

1.8. Кадимки адырашман - Реganum harmala;

1.9. Бийик карындыз - Inula helenium;

1.10. Кадимки жыттуу чай - Origanum vulgare;

1.11. Жостер - Rhamnus cathartica;

1.12. Чай чөп - Hypericum perforatum;

1.13. Майда тикендүү чатыраш - Acanthophyllum paniculatum;

1.14. Эки үйлүү чалкан - Urtica dioica;

1.15. Дарыканалык нан кабыкча - Sanguisorba officinalis;

1.16. Марена - Rubia tinctorum;

1.17. Өгөй эне өз эне - Tussilago farfara;

1.18. Дарылык мелисса - Melissa officinalis;

1.19. Түркстан, казак арчасы - Juniperus sabina, J.turkestanica;

1.20. Кадимки жана талаа жалбызы - Mentha silvestris, Mentha arvensis;

1.21. Чычырканак - Hippophae rhamnoides;

1.22. Койчу баштык - Capsella bursa pastoris;

1.23. Орточо патриния - Patrinia intermedia;

1.24. Кадимки пижма - Tanacetum vulgare;

1.25. Орточо чымылдык - Paeonia intermedia;

1.26. Чоң бака жалбырак - Plantago major;

1.27. Ачуу эрмен - Artemisia absinthium;

1.28. Түркстан арстан куйругу - Leonurus turkestanica;

1.29. Максимович ышкыны - Rheum - Ышкын;

1.30. Дарыканалык чатыр гүл - Matricaria recutita;

1.31. Тяньшань четини - Sorbus tianschanica;

1.32. Жылаңач солодка - Glycyrrhiza glabra;

1.33. Ланцет термопсис - Thermopsis lanceolata;

1.34. Маршалл тимьяны - Thymus marschallianus;

1.35. Муунак жалбырактуу солкулдак - Achillea setacea;

1.36. Ферула - Ferula foetida;

1.37. Кыркмуун ийне жалбырак (эфедра хвощевая) - Ephedra equisetina;

1.38. Талаа кыркмууну - Equisetum arvense;

1.39. Үч бөлүктүү ит уйгак - Bidens tripartita;

1.40. Талаа аткулагы - Salvia deserta;

1.41. Итмурун (бардык түрлөрү) - Rosa sp.;

1.42. Дарыканалык топ баш гүл (эркек папоротник) - Dryopteris filixmas.

2. Тамак-аш өсүмдүктөрү

2.1. Бөрү карагат (Кызыл китепке кирген түрлөрдөн башкасы) - Berberis heteropoda;

2.2. Жаңгак - Juglans regia;

2.3. Бүлдүркөн - Rubus caesius;

2.4. Тикенектүү каперс - Capparis spinosa;

2.5. Кадимки дан куурай - Rubus idaeus;

2.6. Мейер карагаты - Ribes Meyeri;

2.7. Кадимки мисте - Pistacia vera.

3. Техникалык өсүмдүктөр

3.1. Түштүк камыш, камыш - Phragmites australis;

3.2. Жалтырак чий - Achnatterum splendens.

4. Козу карындар

4.1. Желе турган козу карындар.

Өсүмдүктөр дүйнөсүнүн объекттерин (анын ичинде илимий максаттарда) алып коюуга уруксаттын БИРДИКТҮҮ ФОРМАСЫ

(КР Өкмөтүнүн 2017-жылдын 25-сентябрындагы № 606 токтомунун редакциясына ылайык)