КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2010-жылдын 30-декабры № 344

Кыргыз Республикасынын Жарандык коргонуу боюнча республикалык деңгээлдеги комиссиясы жөнүндө

(КР Өкмөтүнүн 2011-жылдын 4-августундагы № 450, 2012-жылдын 5-июлундагы № 476, 2013-жылдын 1-июлундагы № 395, 2018-жылдын 16-майындагы № 238, 2020-жылдын 12-июнундагы № 331 токтомдорунун редакцияларына ылайык)

Жарандык коргонуунун мамлекеттик системасынын иштешин камсыз кылуу, калкты жана аймактарды өзгөчө кырдаалдардан коргоо маселелери боюнча чечимдерди кабыл алуунун оперативдүүлүк даражасын жогорулатуу максатында, ошондой эле "Жарандык коргонуу жөнүндө" Кыргыз Республикасынын Мыйзамынын 13-беренесине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Жарандык коргонуу боюнча республикалык деңгээлдеги комиссиясы түзүлсүн.

(КР Өкмөтүнүн 2020-жылдын 12-июнундагы № 331 токтомунун редакциясына ылайык)

2. Тиркелген: Кыргыз Республикасынын Жарандык коргонуу боюнча республикалык деңгээлдеги комиссиясынын курамы жана ал жөнүндө жобо бекитилсин.

(КР Өкмөтүнүн 2020-жылдын 12-июнундагы № 331 токтомунун редакциясына ылайык)

3. Жергиликтүү мамлекеттик администрациялардын жана жергиликтүү өз алдынча башкаруу органдарынын башчылары Жарандык коргонуу боюнча облустук, райондук жана шаардык комиссияларды түзүшсүн.

4. Кыргыз Республикасынын министрликтеринин, мамлекеттик комитеттеринин, администрациялык ведомстволорунун, уюмдарынын жана ишканаларынын жетекчилери Жарандык коргонуу боюнча тиешелүү тармактык жана объектилик комиссияларды түзүшсүн.

5. Төмөнкүлөр күчүн жоготту деп табылсын:

- Кыргыз Республикасынын Өкмөтүнүн 2006-жылдын 13-мартындагы № 156 "Өзгөчө кырдаалдардын алдын алуу жана жоюу боюнча ведомстволор аралык комиссия жөнүндө" токтому;

- Кыргыз Республикасынын Өкмөтүнүн 2007-жылдын 27-августундагы № 377 "Кыргыз Республикасынын Өкмөтүнүн айрым чечимдерине өзгөртүүлөрдү жана толуктоолорду киргизүү жана күчүн жоготту деп табуу жөнүндө" токтомунун 67-пункту.

6. Бул токтом расмий жарыяланган күндөн тартып күчүнө кирет.

Кыргыз Республикасынын Жарандык коргонуу боюнча республикалык деңгээлдеги комиссиясынын курамы

(КР Өкмөтүнүн 2020-жылдын 12-июнундагы № 331 токтомунун редакциясына ылайык)

Кыргыз Республикасынын Премьер-министри, Кыргыз Республикасынын Жарандык коргонуусунун начальниги;

Кыргыз Республикасынын Өзгөчө кырдаалдар министри, Кыргыз Республикасынын Жарандык коргонуусунун начальнигинин орун басары;

Кыргыз Республикасынын Ички иштер министри;

Кыргыз Республикасынын Тышкы иштер министри;

Кыргыз Республикасынын Саламаттык сактоо министри;

Кыргыз Республикасынын Финансы министри;

Кыргыз Республикасынын Экономика министри;

Кыргыз Республикасынын Транспорт жана жол министри;

Кыргыз Республикасынын Айыл чарба, тамак-аш өнөр жайы жана мелиорация министри;

Кыргыз Республикасынын Маданият, маалымат жана туризм министри;

Кыргыз Республикасынын Билим берүү жана илим министри;

Кыргыз Республикасынын Эмгек жана социалдык өнүктүрүү министри;

Кыргыз Республикасынын Коргоо иштери боюнча мамлекеттик комитетинин төрагасы;

Кыргыз Республикасынын Өнөр жай, энергетика жана жер казынасын пайдалануу мамлекеттик комитетинин төрагасы;

Кыргыз Республикасынын Маалыматтык технологиялар жана байланыш мамлекеттик комитетинин төрагасы;

Кыргыз Республикасынын Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигинин директору;

Кыргыз Республикасынын Өкмөтүнө караштуу Курчап турган чөйрөнү коргоо жана токой чарбасы мамлекеттик агенттигинин директору;

Кыргыз Республикасынын Өкмөтүнө караштуу Суу ресурстары мамлекеттик агенттигинин директору;

Кыргыз Республикасынын Өкмөтүнө караштуу Жер ресурстары боюнча мамлекеттик агенттиктин директору;

Кыргыз Республикасынын Өкмөтүнө караштуу Мамлекеттик материалдык резервдер фондунун директору;

Кыргыз Республикасынын Өкмөтүнө караштуу Ветеринардык жана фитосанитардык коопсуздук боюнча мамлекеттик инспекциянын директору;

Кыргыз Республикасынын Өкмөтүнө караштуу Экологиялык жана техникалык коопсуздук боюнча мамлекеттик инспекциянын директору;

Кыргыз Республикасынын Өкмөтүнүн облустардагы ыйгарым укуктуу өкүлдөрү;

Ош жана Бишкек шаарларынын мэрлери (макулдашуу боюнча).

Кыргыз Республикасынын Жарандык коргонуу боюнча республикалык деңгээлдеги комиссиясы жөнүндө жобо

(КР Өкмөтүнүн 2018-жылдын 16-майындагы № 238, 2020-жылдын 12-июнундагы № 331 токтомдорунун редакцияларына ылайык)

1. Кыргыз Республикасынын Жарандык коргонуу боюнча республикалык деңгээлдеги комиссиясы (мындан ары - Комиссия) Жарандык коргонуунун Мамлекеттик системасынын республикалык деңгээлдеги жөнгө салуучу башкаруу органы болуп саналат.

(КР Өкмөтүнүн 2020-жылдын 12-июнундагы № 331 токтомунун редакциясына ылайык)

2. Комиссиянын негизги милдеттери:

- Жарандык коргонуу тармагында бирдиктүү мамлекеттик саясатты иштеп чыгууга жана ишке ашырууга жетекчилик кылуу;

- Жарандык коргонуу тармагында жалпы мамлекеттик иш-чараларды уюштуруу жана жүргүзүү;

- Кыргыз Республикасынын аймагында Жарандык коргонууну уюштуруу жана жүргүзүү боюнча министрликтердин, мамлекеттик комитеттердин, административдик ведомстволордун, жергиликтүү мамлекеттик администрациялардын, жергиликтүү өз алдынча башкаруу органдарынын, жана көмөктөшүүчү субъектилердин ишмердүүлүктөрүн координациялоо.

(КР Өкмөтүнүн 2018-жылдын 16-майындагы № 238 токтомунун редакциясына ылайык)

3. Комиссиянын функциялары:

- Жарандык коргонуунун Мамлекеттик системасын өнүктүрүүнүн стратегиясын, өзгөчө кырдаалдардан Кыргыз Республикасынын калкын жана аймагын коргоону камсыз кылуу боюнча укуктук нормаларды иштеп чыгууга жана ишке ашырууга жетекчилик кылуу;

- тынчтык жана согуш убагында Жарандык коргонуу боюнча иш-чараларды координациялоо;

- Жарандык коргонуу жаатындагы мамлекеттик максаттуу илимий-техникалык изилдөөлөрдү жана атайын программаларды уюштуруу;

- өзгөчө кырдаалдардын кесепетин божомолдоо жана социалдык-экономикалык баа берүү;

- мамлекеттик каражаттардын эсебинен Жарандык коргонуу боюнча кечиктирилгис иш-чараларды каржылоо маселесин чечүү;

- Жарандык коргонуунун башкаруу органдарынын, мамлекеттик органдарынын күчтөрүнүн жана каражаттарынын жана жергиликтүү өз алдынча башкаруу органдарынын даярдыгын камсыз кылуу;

- Жарандык коргонуу жагында эл аралык кызматташуунун негизги багыттарын аныктоо;

- өзгөчө кырдаалдардын кесепетин жоюу үчүн финансылык жана материалдык резервдерди түзүү.

4. Комиссия белгиленген тартипте төмөнкү ыйгарым укуктарга ээ:

- Кыргыз Республикасынын министрликтеринин, мамлекеттик комитеттеринин, административдик ведомстволорунун, жергиликтүү мамлекеттик администрацияларынын, жергиликтүү өз алдынча башкаруу органдарынын, менчигинин түрүнө карабастан бардык уюмдарынын, ошондой эле коомдук бирикмелеринин жетекчилерин жана Жарандык коргонуу боюнча комиссиялардын төрагаларын Комиссиянын компетенциясына кирген маселелер боюнча угууга;

- Кыргыз Республикасынын министрликтеринен, мамлекеттик комитеттеринен, административдик ведомстволорунан, жергиликтүү мамлекеттик администрацияларынан, жергиликтүү өз алдынча башкаруу органдарынан, менчигинин түрүнө карабастан бардык уюмдарынан, ошондой эле коомдук бирикмелеринен комиссиянын иши үчүн зарыл болгон маалыматты сурап алууга;

- ири масштабдагы өзгөчө кырдаалдардын кесепетин жоюунун жетекчисин дайындоо жана алардын келип чыккан учурунда мамлекеттик жардам көрсөтүү жөнүндө чечим кабыл алууга;

- Жарандык коргонуу муктаждыгы үчүн мамлекеттик финансылык жана материалдык резервдерди түзүү жөнүндө сунуштарды киргизүүгө жана аларды пайдалануу тартибин аныктоого;

- комиссиянын алдында зарыл болгон учурда Жарандык коргонуу жагында атайын милдеттерди чечүү боюнча сунуштарды иштеп чыгуу үчүн кеңештерди, жумушчу топторду түзүүгө;

- Кыргыз Республикасынын министрликтеринин, мамлекеттик комитеттеринин, административдик ведомстволорунун, жергиликтүү мамлекеттик администрацияларынын, жергиликтүү өз алдынча башкаруу органдарынын, менчигинин түрүнө карабастан бардык уюмдарынын, ошондой эле коомдук бирикмелеринин адистерин Жарандык коргонуу маселелери боюнча аналитикалык, эксперттик жана башка жумуштарды аткаруу үчүн тартууга;

- комиссиянын кабыл алынган чечимдерин контролдоого жана аларды аткарбоо үчүн кызмат адамдарынын жоопкерчилик чаралары жана даражасы жөнүндө сунуштарды киргизүүгө.

5. Комиссиянын ишин уюштуруу-техникалык жактан камсыз кылуу Кыргыз Республикасынын Өзгөчө кырдаалдар министрлигине жүктөлөт.

6. Комиссиянын жыйыны кварталына бир жолудан кем эмес зарылдыгына жараша өткөрүлөт. Комиссиянын чечимдери протокол түрүндө таризделет.

Кыргыз Республикасынын Өкмөтүнүн чечимин талап кылуучу маселелер боюнча комиссия тиешелүү сунуштарды белгиленген тартипте киргизет.