КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН

ТОКТОМУ

2023-жылдын 16-январы № 20

Региондорду өнүктүрүү фонддору жөнүндө типтүү жобону бекитүү тууралуу

(КР Министрлер Кабинетинин 2023-жылдын 6-апрелиндеги № 187, 2023-жылдын 12-октябрындагы № 545 токтомдорунун редакцияларына ылайык)

Региондорду өнүктүрүү фонддорунун ишин өркүндөтүү максатында, Кыргыз Республикасынын Бюджеттик кодексинин 34-беренесине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Төмөнкүлөр бекитилсин:

- Региондорду өнүктүрүү фонддору жөнүндө типтүү жобо 1-тиркемеге ылайык;

- социалдык жана инфраструктуралык долбоорлор үчүн каржылоону алууга өтүнмө 2-тиркемеге ылайык;

- экономикалык долбоорлор үчүн каржылоону алууга өтүнмө 3-тиркемеге ылайык;

- социалдык жана инфраструктуралык долбоорлорду тандоо критерийлери 4-тиркемеге ылайык;

- экономикалык долбоорлорду тандоо критерийлери 5-тиркемеге ылайык;

- Социалдык жана инфраструктуралык долбоорлорду максаттуу каржылоо жөнүндө келишим 6-тиркемеге ылайык;

- (КР Министрлер Кабинетинин 2023-жылдын 12-октябрындагы № 545 токтомуна ылайык күчүн жоготту)

- Кыргыз Республикасынын региондорун өнүктүрүү фонддорунун ишине мониторинг жүргүзүүнүн жана баалоонун типтүү методикасы 8-тиркемеге ылайык.

(КР Министрлер Кабинетинин 2023-жылдын 12-октябрындагы № 545 токтомунун редакциясына ылайык)

2. Кыргыз Республикасынын Президентинин облустардагы ыйгарым укуктуу өкүлдөрү жана жергиликтүү мамлекеттик администрациялар үч айлык мөөнөттө Региондорду өнүктүрүү фонддорунун уставдык документтерин ушул токтомдун 1-пунктуна ылайык келтирсин.

3. Төмөнкүлөр күчүн жоготту деп таанылсын:

- Кыргыз Республикасынын Министрлер Кабинетинин 2021-жылдын 14-октябрындагы № 220 "Региондорду өнүктүрүү фонддору тууралуу типтүү жобону бекитүү жөнүндө" токтому;

- Кыргыз Республикасынын Министрлер Кабинетинин 2022-жылдын 12-июлундагы № 376 "Кыргыз Республикасынын Министрлер Кабинетинин 2021-жылдын 14-октябрындагы № 220 "Региондорду өнүктүрүү фонддору тууралуу типтүү жобону бекитүү жөнүндө" токтомуна өзгөртүүлөрдү киргизүү тууралуу" токтому.

4. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

5. Бул токтом расмий жарыяланган күндөн тартып жети күн өткөндөн кийин күчүнө кирет.

"Эркин Тоо" газетасынын 2023-жылдын 24-январындагы №5 жарыяланды

Социалдык жана инфраструктуралык долбоорлор үчүн каржылоону алууга ӨТҮНМӨ

Техникалык документтер жана уруксат берүүчү документтер*

Инфраструктуралык объектти изилдөөнүн дефекттик акт

Айыл _____________________________________ айыл аймагы

Күнү ___________________________________________________

1. Комиссиянын курамы: (АК жана АӨ өкүлдөрүнөн; ДТ мүчөлөрүнөн; коомчулуктун көз карандысыз өкүлдөрүнөн, КЭУ; зарылчылыкка жараша чакыртылган техникалык эксперт):

2. Текшерүүнүн максаты: объекттин негизги конструкцияларынын жана элементтеринин техникалык абалын, оңдоо иштеринин көлөмүн, керектүү материалдардын жана жабдуулардын түрлөрүн жана санын комиссияда аныктайт.

3. Текшерүүнүн натыйжалары:

Техникалык абалды баалоо: "жакшы", "канааттандырарлык", "канааттандырарлык эмес", "авариялык абалда".

Колдору:

Долбоордун деталдуу сметасы жана бюджети

1-таблица. Иштин наркын эсептөө

2-таблица. Сатып алынуучу материалдардын жана жабдуулардын наркын эсептөө

3-таблица. Техниканы жана автотранспортту ижарага алуунун наркын эсептөө

4-таблица. Консультациялык кызмат көрсөтүүлөрдүн наркын эсептөө

5-таблица. Жыйынды отчёт жана каржылоо планы

Долбоорду ишке ашыруу планы

1-таблица. Иштерди аткаруунун пландуу жана иш жүзүндөгү мөөнөттөрү

2-таблица. Иш-аракеттердин жалпы планы, ишти аткаруунун ыкмалары жана мөөнөттөрү

Долбоордун туруктуулугу

Долбоор боюнча биргелешкен мониторинг жана баалоо планы

Долбоорду ишке ашыруу прогрессине жана натыйжаларына биргелешкен мониторинг жүргүзүү жана баалоо планы

Экологиялык талдоо боюнча текшерүү баракчасы

1. Долбоордун аталышы:_______________________________________

2. Долбоордун кыскача баяндамасы (сыпаттама, объекттин аймагы,

жайгашкан жери, менчиги) _____________________________________

3. Долбоорду ишке ашыруунун же эксплуатациялоонун жүрүшүндө

айлана-чөйрөнүн төмөндө келтирилген параметрлерине таасири барбы.

4. Курулуш (К) фазасында, долбоорду эксплуатациялоо (Э) фазасында же эки учурда (КЭ) колдонула турган жогоруда белгиленген айлана-чөйрөнүн компоненттери үчүн жумшартуу чараларын сүрөттөңүз.

Экономикалык долбоорлор үчүн каржылоону алууга өтүнмө

Өтүнмө ээсинин анкетасы

Социалдык жана инфраструктуралык долбоорлорду тандоо КРИТЕРИЙЛЕРИ

(КР Министрлер Кабинетинин 2023-жылдын 6-апрелиндеги № 187 токтомунун редакциясына ылайык)

Экономикалык долбоорлорду тандоо КРИТЕРИЙЛЕРИ

(КР Министрлер Кабинетинин 2023-жылдын 6-апрелиндеги № 187,  2023-жылдын 12-октябрындагы N 545 токтомдорунун редакциясына ылайык)

Социалдык жана инфраструктуралык долбоорлорду максаттуу каржылоо жөнүндө КЕЛИШИМ

20___-жылдын "___"_____________

_______________________________ районун/облусун өнүктүрүү фонду, мындан ары Фонд деп аталып, Фонддун аткаруучу директору ______________________________________________________________ атынан жана ________________________________ айыл аймагынын/шаарынын мамлекеттик мекемеси/жергиликтүү өз алдынча башкаруунун аткаруу органы, мындан ары "Алуучу" деп аталып, бирге "Тараптар" деп аталып, төмөнкүлөр жөнүндө ушул Келишимди түздү:

1-глава. Келишимдин предмети

1.1. Фонд конкурстук тандоонун жыйынтыгы боюнча Алуучуга акча каражаттарын акысыз негизде берет, ал эми Алуучу ушул Келишимдин шарттарына ылайык ________________________________ долбоорун ишке ашыруу үчүн аларды максаттуу багыты боюнча пайдаланууга милдеттенет.

1.2. Долбоорду каржылоо ушул Келишимде каралган шарттарда, Келишимге долбоорду ишке ашыруу планына (мындан ары - Планга) (1-тиркеме), Алуучунун жана Фонддун каражаттарынын эсебинен жабылуучу чыгымдардын сметасына (мындан ары - Смета) (2-тиркеме) жана долбоорду каржылоо планына (3-тиркеме) ылайык жүзөгө ашырылат.

1.3. 1,2 жана 3-тиркемелер ушул Келишимдин ажырагыс бөлүгү болуп саналат, көрсөтүлгөн тиркемелерсиз Келишим жараксыз болуп эсептелет.

1.4. Долбоорду ишке ашыруу мөөнөтү: 20______-жылдын _______________ тартып ___________ чейин.

2-глава. Гранттын өлчөмү жана төлөө тартиби

2.1. Каржылоонун жалпы суммасы _________________ (сумма жазуу менен) сомду түзөт.

2.2. Акча каражаттары Фонд тарабынан бөлүктөр (транштар) менен берилет, мында бардык транштардын суммасы ушул Келишимдин 2.1-пунктуна ылайык каржылоонун жалпы суммасынан ашпоого тийиш.

2.3. Фонд акча каражаттарын Алуучу тарабынан сатып алуу жол-жоболорунун алкагында тандалып алынган жана аны менен жумуштарды/товарларды/кызматтарды көрсөтүүлөрдү жеткирүү келишимине кол койгон уюмдун-подрядчынын алыш-бериш эсебине жөнөтөт.

2.4. Транштар Алуучунун өтүнмөсүнүн негизинде подрядчыга чегерилет, ал мурунку жумуштардын жана мурунку транштардын аткарылгандыгы тууралуу актты камтыйт.

2.5. Акча каражаттарын которгондугу үчүн банктар алуучу бардык комиссиялык төлөмдөрдү Тараптар өз алдынча жана өз эсебинен, Фонддун банкында - "Фонд", Алуучунун банкында - "Алуучу" төлөйт.

3-глава. Фонддун укуктары жапа милдеттери

3.1. Фонд ушул Келишимде аныкталган шарттарга ылайык мөөнөттөрдө жана көлөмдөрдө каржылоону камсыз кылууга милдеттенет.

Фонд көрсөтүлгөн шарттарды бир тараптуу тартипте өзгөртүүгө укуктуу эмес.

3.2. Фонд Алуучунун долбоорду ишке ашырууга катышуучу үчүнчү жактарды тандоосуна жоопкерчилик тартпайт.

3.3. Долбоордун ишке ашырылышын натыйжалуу контролдоону камсыз кылуу үчүн Фонд Алуучудан долбоорду ишке ашыруунун жүрүшү, акча каражаттарынын сарпталышы жөнүндө отчеттук документтерди, долбоорду ишке ашыруу мезгилинде акча каражаттарын пайдаланууга тийиштүү бухгалтердик отчетту, финансылык документтерди алууга укуктуу.

3.4. Фонд Алуучуга карата долбоорду ишке ашыруунун каалаган стадиясында максаттуу каржылоону камсыз кылууга багытталган, Кыргыз Республикасынын мыйзамдарында жана ушул Келишимде каралган таасир көрсөтүү чараларын колдонууга укуктуу.

4-глава. Алуучунун укуктары жана милдеттери

4.1. Алуучу алынган жана өздөштүрүлгөн каражаттардын эсебин ушул Келишимдин негизинде жүргүзүүгө милдеттенет.

4.2. Алуучу ушул Келишимде (4-тиркеме) белгиленген форма боюнча жана мөөнөттөрдө акча каражаттарынын пайдаланылышы жөнүндө отчетту Фондго берүүгө милдеттенет.

4.3. Алуучу төмөнкүлөргө милдеттүү:

4.3.1. Акча каражаттарын долбоордун сметасына ылайык ушул Келишимде аныкталган максаттарда гана пайдаланууну камсыз кылууга.

4.3.2. Планда белгиленген талаптарга ылайык жана ушул Келишимде белгиленген мөөнөттөрдө долбоорду толук көлөмдө ишке ашырууну камсыз кылууга.

4.3.3. Долбоорду ишке ашыруунун жүрүшү жөнүндө отчетту Фондго ар кварталдык негизде берүүгө. Фонддун сын пикирлери, Пландан, Сметадан жана Каржылоо планынан четтөөлөр бар болсо, Алуучу Фонд менен макулдашуу боюнча тиешелүү өзгөртүүлөрдү киргизүүгө милдеттүү.

4.4. Алуучу долбоорду ишке ашыруунун мүмкүн эместиги же ишке ашырууну улантуунун мүмкүн эместиги жөнүндө Фондго кечиктирбестен маалымдоого тийиш. Мындай учурда Алуучу 3 (үч) банктык күндүн ичинде подрядчынын эсебинен өздөштүрүлбөгөн акча каражаттарын кайтарууну камсыз кылууга тийиш жана 10 (он) жумуш күндүн ичинде Фондго ушул Келишимдин 5-главасына ылайык акча каражаттарын максаттуу пайдалануу тууралуу отчётту бериши керек.

5-глава. Отчёттуулук жана контроль

5.1. Фонддун акча каражаттарынын пайдаланылышы жана долбоордун ишке ашырылышы жөнүндө жазуу жүзүндөгү отчет Алуучу тарабынан Планга, Сметага жана Долбоордо коюлган максаттарга жетүү боюнча каржылоо планына ылайык маалыматты камтыган долбоор аяктагандан кийин 1 айдан кечиктирбестен 2 (эки) нускада Фондго берилет.

5.2. Фонд долбоор жөнүндө фото жана (же) видео отчетторду жана башка маалыматты толук көлөмдө же алардын каалаган бөлүктөрүн жалпыга маалымдоо каражаттарында жана Интернет тармагында жарыялоого укуктуу.

5.3. Фонд Алуучудан отчетту алып, аны карап чыгат жана анын толуктугун жана ишенимдүүлүгүн баалайт. Отчетту карап чыгуу процессинде Фонд Алуучудан долбоорду ишке ашыруу жөнүндө толук түшүнүк алуу үчүн бардык документтерди жана долбоорду ишке ашыруунун жүрүшү, анын жыйынтыктары жана акча каражаттарын сарптоонун максаттуу мүнөзү жөнүндө маалыматты талап кылууга укуктуу, ал эми Алуучу аны берүүгө тийиш.

5.4. Фонд долбоордун оңдолушун же жеткире иштелип чыгышын жана акча каражаттарынын пайдаланылышы жөнүндө отчетту талап кылууга укуктуу, ал эми Алуучу Фонддун бул талабын Тараптар макулдашкан мөөнөттө аткарышы керек.

5.5. Эгерде акча каражаттарынын ушул Келишимге ылайык максаттуу багытта сарпталгандыгы жөнүндө шек жаралбаса, Фонд отчетту бекитет жана отчеттун бир нускасын Алуучуга кайтарат.

5.6. Алуучунун ушул Келишим боюнча милдеттенмелери Алуучунун отчету Фонд тарабынан бекитилген учурдан тартып аткарылган болуп саналат.

6-глава. Тараптардын жоопкерчилиги

6.1. Тараптар Кыргыз Республикасынын мыйзамдарына ылайык ушул Келишим боюнча өздөрүнүн милдеттерин талаптагыдай эмес аткаргандыгына мүлктүк жоопкерчиликти тартышат.

6.2. Долбоорду ишке ашыруу үчүн үчүнчү жактарды ишке тартуу Алуучуну ушул Келишимдин талаптарын аткаргандыгы үчүн Фонддун алдында жоопкерчиликтен бошотпойт.

6.3. Алуучу тарабынан акча каражаттарын берүүнүн негизги шарттарынын аткарылбагандыгы, ошондой эле алардын максаттуу пайдаланылышы жөнүндө отчеттун, Фонд талап кылган ырастоочу документтердин ушул Келишимде белгиленген мөөнөттөрдө берилбегендиги же аталган отчётторго анык эмес жана бурмаланган маалыматтардын киргизилиши Алуучунун акча каражаттарын максаттуу пайдалануу боюнча өзүнүн милдеттенмелерин аткарбагандыгы катары каралат.

6.4. Аткаруучу акча каражаттарын максаттуу пайдалануу боюнча өзүнүн милдеттенмелерин аткарбаган учурда Фонд Алуучудан аларды кайтарууну талап кылууга, ошондой эле укук коргоо жана фискалдык органдарга Кыргыз Республикасынын мыйзамдарына ылайык административдик жана кылмыш-жаза жоопкерчилигине тартуу жол-жобосун демилгелөөгө укуктуу.

7-глава. Ушул Келишимди мөөнөтүнөн мурда бузуу жана өзгөртүү

7.1. Ушул Келишим Тараптардын ыйгарым укуктуу өкүлдөрү кол койгон учурдан тартып күчүнө кирет жана Тараптардын өздөрүнүн келишимдик милдеттенмелерин толук аткарганга чейин колдонулат.

7.2. Ушул Келишим Тараптардын макулдашуусу боюнча же Кыргыз Республикасынын колдонуудагы мыйзамдарында каралган тартипте жана негиздер боюнча соттун чечими боюнча (Тараптардын биринин талабы боюнча) бузулушу мүмкүн.

7.3. Фонд тарабынан социалдык маанилүү долбоор боюнча күтүлүүчү жыйынтыктарды алуунун мүмкүн эместиги, акча каражаттарынын максатсыз пайдаланылышы аныкталганда Фонд тарабынан ишке ашырылып жаткан бир тараптуу баш тартуудан жана ушул Келишимде каралган башка учурлардан тышкары, ушул Келишим боюнча алынган милдеттенмелерди аткаруудан бир тараптуу баш тартууга жол берилбейт.

7.4. Ушул Келишимге карата каалаган өзгөртүүлөр жана толуктоолор, кошумча макулдашуулар, эгерде алар жазуу жүзүндө түзүлгөн жана Тараптардын буга ыйгарым укуктуу өкүлдөрү тарабынан кол коюлган шартта жарактуу болуп эсептелет.

8-глава. Талаштарды чечүү

8.1. Ушул Келишим боюнча талаштар пайда болгон учурда Тараптар сүйлөшүү жолу менен аларды чечүү чараларын көрүшөт.

8.2. Талаштарды жана пикир келишпестиктерди сүйлөшүүлөр жолу менен чечүү мүмкүн болбогон учурда талаш маселе Кыргыз Республикасынын мыйзамдарына ылайык каралат.

9-глава. Корутунду жоболор

9.1. Эгерде Тараптар күн мурунтан биле албаган, акылга сыярлык чаралар менен алдын алууга мүмкүн болбогон, өзгөчө мүнөздөгү окуялардын кесепетинен ушул Келишимди түзгөндөн кийин пайда болгон ал жеткис күчтүн жагдайларынын натыйжасында милдеттенмелерди аткарбаса, Тараптар ушул Келишим боюнча милдеттенмелерин аткаруудан жарым-жартылай же толук бошотулат.

9.2. Бардык кабарлоолор жана билдирүүлөр жазуу жүзүндө жөнөтүлүүгө тийиш. Кабарлоолор жана билдирүүлөр заказдык кат менен же Тараптардын тиешелүү өкүлдөрүнө кол коюу менен өткөрүп берилсе, талаптагыдай аткарылган болуп саналат.

Маалыматтарды жана документтерди оперативдүү түрдө алмашуу үчүн Тараптар документти факс, электрондук почта аркылуу жөнөткөн учурдан тартып 2 (эки) күндөн кечиктирбестен, ушул пунктта белгиленген тартипте документтин түп нускасын милдеттүү түрдө жөнөтүү менен телефонду, факсты, электрондук почтаны колдоно алышат.

9.3. Ушул Келишим бирдей юридикалык күчкө ээ эки нускада, Тараптардын ар бири үчүн бирден түзүлдү.

10-глава. Ушул Келишимге тиркемелер

1 -тиркеме - Долбоорду ишке ашыруу планы.

2-тиркеме - Долбоордун сметасы.

3-тиркеме - Долбоорду каржылоо планы.

11-глава. Тараптардын реквизиттери жана колдору

Долбоорду ишке ашыруу планы

Алуучунун жана Фонддун эсебинен жабылуучу чыгымдардын СМЕТАСЫ

Долбоорду каржылоо планы

Акча каражаттарын пайдалануу жөнүндө ОТЧЕТ

Уюмдун аталышы ____________________________________________

Отчет берүү датасы __________________________________________

Отчет берүү мезгили _________________________________________

Регионду өнүктүрүү фонду менен банктын ортосундагы экономикалык долбоорлор боюнча кредиттерди финансы-техникалык тейлөөгө укуктарды өткөрүп берүү боюнча

Мындан ары "Фонд" деп аталуучу "___________________________ өнүктүрүү фонду" мекемеси Уставдын негизинде иштеп жаткан ___________________ аткаруучу директорунун атынан _______________________________________ бир тараптан жана мындан ары "Банк" деп аталуучу "_________________" акционердик коому Банктын уставынын негизинде иштеп жаткан ____________________________ Банктын башкармасынын төрагасынын атынан экинчи тараптан, мындан ары "Тараптар" деп бирге аталуучу, ал эми өзүнчө "Тарап" деп аталуучулар төмөнкүлөр жөнүндө ушул Макулдашууну түзүштү:

 Макулдашуунун предмети

1.1. Региондорду өнүктүрүү фонддору жөнүндө Типтүү жобого (мындан ары - "Типтүү жобо") ылайык Фонддор экономикалык долбоорлор боюнча кредиттерди финансы-техникалык тейлөөгө Банкка укуктарды жана акча каражаттарын өткөрүп берүү аркылуу ишкердик субъекттерин каржылайт.

1.2. Фонд Банкка Кыргыз Республикасынын улуттук валютадагы акча каражаттарын мөөнөттүүлүк, кайтарымдуулук, акы төлөнүүчүлүк шарттарында, Типтүү жободо жана ушул Макулдашууда каралган тартипте жана шарттарда берет, ал эми Банк алынган акча каражаттарын кайтарып берүүгө жана аны пайдалангандыгы үчүн пайыздарды Фондго төлөөгө милдеттенет.

1.3. Банк тарабынан кредиттерди финансы-техникалык тейлөө төмөнкү шарттарды сактоо менен Банктын ички ченемдик актыларына ылайык жүргүзүлөт:

1) ишкердик субъекттери үчүн чектик пайыздык ставка төмөнкүлөрдү түзөт:

5 жылга чейинки мөөнөт менен инвестициялык ишти каржылоо үчүн - жылдык 6%, анын ичинен Фонддун пайыздык кирешеси - жылдык 2%;

3 жылга чейинки мөөнөт менен жүгүртүү капиталын каржылоо үчүн - жылдык 6%, анын ичинен Фонддун пайыздык кирешеси - жылдык 2%;

2) долбоорду алыскы, жетүүгө кыйын, бийик тоолуу жана чек арага жакын аймактарда ишке ашырган ишкердик субъекттери үчүн чектик пайыздык ставка:

7 жылга чейинки мөөнөт менен инвестициялык ишти каржылоо үчүн - жылдык 5,5%, анын ичинен Фонддун пайыздык кирешеси - жылдык 1,5%;

5 жылга чейинки мөөнөт менен жүгүртүү капиталын каржылоо үчүн - жылдык 5,5%, анын ичинен Фонддун пайыздык кирешеси - жылдык 1,5%.

1.4. Ушул Макулдашууга ылайык Фонд тарабынан Банкка берилүүчү акча каражаттары максаттуу багытка ээ жана иши регионду социалдык-экономикалык өнүктүрүүгө . багытталган Кыргыз Республикасынын ______________ облусунун _______________ районунун аймагында катталган жана өз ишин жүзөгө ашырган ишкердик субъекттерине кредит берүү үчүн арналган.

2. Экономикалык долбоорлорду каржылоо тартиби

2.1. Фонд акча каражаттарын Фонддун Байкоочу кеңешинин чечимдерине ылайык өлчөмдө толугу менен же транштар менен Кыргыз Республикасынын улуттук валютасында Фонддун Банктагы алыш-бериш эсебине которот.

2.2. Фонд квартал сайын ишкердик субъекттеринен алынган өтүнмөлөрдүн негизинде, алар Банктын шарттарына жана талаптарына ылайык келген учурда, каржыланууга тийиш болгон экономикалык долбоорлордун (мындан ары - долбоорлор) тизмегин түзөт жана бекитет. Фонддун Байкоочу кеңешинин тиешелүү чечими Банкка жана өтүнмө ээлерине учурдагы кварталдын үчүнчү айынын 1инен кечиктирилбестен жиберилет.

2.3. Фонддун Байкоочу кеңешинин чечими менен жактырылган долбоорлордун өтүнмө ээлери Банктын шарттарына жана талаптарына ылайык зарыл документтерди андан ары берүү үчүн Банкка кайрылат.

2.4. Банк Фонддун Байкоочу кеңешинин чечиминин негизинде ишкердик субъекттеринин өтүнмөлөрүн ушул Макулдашуунун алкагында Банктын ички регламентинде белгиленген мөөнөттөрдө карайт.

2.5. Долбоору Банктын талаптарына жана шарттарына ылайык келген ишкердик субъекти менен Банктын ортосунда жогоруда көрсөтүлгөн шарттарда ушул Макулдашууга карата кредиттик келишим түзүлөт жана Фонддун Байкоочу кеңешинин чечиминде аныкталган суммага "Төлөө графиги" түзүлөт (аннуитеттик, кварталдык, жеңилдетилген мезгил менен). Банктын талаптарына жана шарттарына ылайык келбеген долбоорлор Банк тарабынан четке кагылышы мүмкүн.

2.6. Банк менен ишкердик субъектинин ортосундагы кредиттик келишимдин алкагында акча каражаттарын накталай берүү үчүн комиссияны төлөө 0,5%дан ашпаган өлчөмдө белгиленет жана ишкердик субъекти тарабынан жабылат.

2.7. Ишкердик субъекттери үчүн чектик пайыздык ставкалар жана акча каражаттарын пайдалангандыгы үчүн Банк тарабынан Фондго төлөнүүчү пайыздар ушул Макулдашуунун 1.3-пунктунда аныкталган.

2.8. Пайыздарды кошуп эсептөө үчүн жалпы мезгил болуп зайымчыга акча каражаттары берилген күндөн кийинки күндөн тартып кредиттик келишимдин ажырагыс бөлүгү болуп саналган "Карызды төлөө графигине" ылайык пайыздарды кошуп эсептөө мөөнөтү аяктаган күнгө чейинки мезгил эсептелет (кошо алганда же зайымчы бардык кредитти толук мөөнөтүнөн мурда төлөп берген күнгө чейин (кошо алганда).

3. Тараптардын укуктары жана милдеттенмелери

3.1. Банк Фонддун акча каражаттарын Фонддун Байкоочу кеңешинин чечими менен жактырылган ишкердик субъекттерине кредиттерди берүүгө гана пайдаланууга милдеттенет.

3.2. Банк Фонддон алынган акча каражаттарын ушул Макулдашуунун 3.1-пунктунда көрсөтүлгөндөрдөн айырмаланган башка операцияларды жүргүзүү үчүн, анын ичинде банктар аралык рынокто, валюта рыногунда жана мамлекеттик баалуу кагаздар рыногун кошо алганда, баалуу кагаздар рыногунда операцияларды жүргүзүү үчүн өз алдынча пайдаланууга укуксуз.

3.3. Зайымчылар тарабынан Банкка ишкердик субъекти менен Банктын ортосундагы кредиттик келишим боюнча акча каражаттарын пайдалангандыгы үчүн пайыздардын жана негизги карыздын суммасын төлөө эсебине төлөнүүчү акча каражаттары ай аяктагандан кийинки биринчи жумуш банк күндөрү боюнча ар айлык негизде Фонддун алыш-бериш эсебине келип түшүүгө тийиш жана Фонд тарабынан жактырылган экономикалык долбоорлорду андан ары кайра инвестициялоого жумшалышы мүмкүн.

3.4. Акча каражаттарын кайра инвестициялоонун кредиттик каражаттарын алууга өтүнмөлөр жок болгон учурда, Фонддун кайрылуусунун негизинде Банк Фонддун бош акча каражаттарын депозиттик эсепке мөөнөттүү салым жана/же талап кылынганга чейинки салым түрүндө Банктын белгиленген тарифтерине ылайык өлчөмдө пайыздарды Фондго кошуп эсептөө менен жайгаштырат.

3.5. Банк Фонддон алынган акча каражаттарын ушул Макулдашуунун алкагында тамеки жана тамеки продукциясын, алкоголдук ичимдиктерди, курал-жарактарды жана ок-дарыларды, баңги жана психотроптук заттарды (медициналык маанидеги препараттарды кошпогондо) жана жарандык жүгүртүүдөн алынган же жарандык жүгүртүүдө чектелген башка товарларды өндүрүүгө, ошондой эле мажбурлаган жана балдар эмгегине жана Кыргыз Республикасынын мыйзамдарында тыюу салынган башка иштин түрлөрүнө жумшоого укуксуз.

3.6. Төлөө графиги боюнча каралган төлөмдү төлөөгө Банк тарабынан которулган каражаттар жетишсиз болгон учурда, ушул Макулдашуу боюнча Банк тарабынан жүргүзүлгөн төлөмдөр биринчи кезекте негизги сумманы, андан кийин пайыздарды, андан кийин айыптарды төлөөгө эсептелет.

3.7. Банк финансылык каражаттарды пайдалануунун бүткүл мезгилинде Фонддун жазуу жүзүндөгү билдирүүсү боюнча ушул Макулдашуунун алкагында долбоорлорду каржылоого тиешелүү Банктын финансы-чарбалык иши боюнча зарыл маалыматтарды берүүгө милдеттенет.

3.8. Ушул Макулдашууну аткарууга байланышкан чыгымдар (анын ичинде маалыматтарды жана/же документтерди өткөрүп берүүгө байланышкан чыгымдар, каражаттарды которуу боюнча чыгымдар ж.б.) ушул Макулдашуунун алкагында Банкка жүктөлөт.

3.9. Эгерде ушул Макулдашуу боюнча кандайдыр бир төлөмдү аткаруу датасы жумуш банк күнү болуп саналбаган күнгө туура келсе, анда мындай төлөм жумуш эмес күндөн кийинки биринчи жумуш күнү жүзөгө ашырылууга тийиш.

3.10. Банк Фонддун Байкоочу кеңешинин чечимине негизделген, Фонддун Банкка жазуу жүзүндөгү билдирмесинде аныкталган өлчөмдө, Фонд тарабынан акча каражаттарын алуунун болжолдонгон датасына чейин 15 календардык күндөн кем эмес убакытта бош акча каражаттарын кайтарууну камсыз кылат.

3.11. Банк ушул Макулдашууга ылайык Фонддон алынган акча каражаттарынын максаттуу пайдаланылышы үчүн жоопкерчилик тартат.

3.12. Ишкердик субъекттери тарабынан кредиттерди берүү жана кайтарып берүү боюнча бардык тобокелдиктер Банкта болот.

4. Талаш-тартыштарды чечүү

4.1. Тараптардын ортосундагы ар кандай талаш-тартыштар, карама-каршылыктар жана ушул Макулдашуу менен байланышкан же натыйжасы болуп саналган өз ара дооматтар сүйлөшүүлөрдү жүргүзүү же дооматтарды жиберүү аркылуу чечилет.

4.2. Тараптардын ортосундагы ар кандай талаш-тартыштар, карама-каршылыктар жана өз ара дооматтар сүйлөшүүлөр аркылуу чечилиши мүмкүн эмес болсо, Кыргыз Республикасынын мыйзамдарына ылайык сот тартибинде чечилүүгө тийиш.

4.3. Форс-мажордук жагдайлар (ал жеткис күчтүн аракети) келип чыккан учурда Банк форс-мажор колдонулган убакта ушул Макулдашуу боюнча өзүнө алган милдеттенмелерди аткарууну убактылуу токтотот же узартат. Форс-мажордук жагдайлардын келип чыгуу фактысы тараптардын ортосундагы акт же болбосо башка тиешелүү документ менен таризделет. Форс-мажорду колдонуу токтотулганда, Банк Фонддун алдындагы милдеттенмелерин толук түрдө жана минималдуу мөөнөттө аткарууга милдеттенет.

4.4. Банк тарабынан акча каражаттарынын бардык суммасын (бир бөлүгүн) кайтарып берүү боюнча милдеттенмелер аткарылбаган учурда, мөөнөтү өткөн карыздын суммасына Банк тарабынан ушул Макулдашуу боюнча милдеттенмелерди аткаруу мөөнөтү өтүп кеткен учурдан тартып, мөөнөтү өтүп кеткен карыздын бардык суммасын иш жүзүндө төлөө күнүн кошуп алганда, жылдык 4% ставка боюнча пайыздар кошуп эсептелет.

4.5. Банк ушул Макулдашууга ылайык өзүнө алган милдеттенмелерди бузган учурда, Фонд ушул Макулдашуунун 4.4-пунктунда көрсөтүлгөн ставка боюнча акча каражаттарын пайдалануунун иш жүзүндөгү убактысы үчүн пайыздарды жана негизги Зайымдын суммасын мөөнөтүнөн мурда төлөөнү Банктан талап кылууга укуктуу.

5. Кредитке мониторинг жүргүзүү

5.1. Фонддун суроо-талабы боюнча Банк Фондго акча каражаттарын жайгаштыруу жөнүндө отчет берет жана Фонддун акча каражаттарын максаттуу пайдаланууну талдоо үчүн керектүү маалыматтарды берет.

5.2. Фонд жана Банк акча каражаттарынын максаттуу пайдаланылышына мониторинг жүргүзүүнүн жүрүшүндө текшерилиши мүмкүн болбогон, аларга берилген маалыматтардын мазмунунун ылайык келиши үчүн бири-биринин алдында жоопкерчилик тартпайт.

5.3. Фонддун Банктан алынган банктык сырды түзгөн маалыматты Кыргыз Республикасынын мыйзамдарында белгиленген учурлардан тышкары, Банктан тиешелүү жазуу жүзүндөгү уруксатты албастан каалаган үчүнчү жактарга берүүгө укугу жок.

6. Башка шарттар

6.1. Ушул Макулдашуу Тараптар ага кол койгон датадан тартып күчүнө кирет жана Тараптар өз милдеттенмелерин толук аткаргандан кийин Тараптардын макулдашуусу боюнча бузулууга тийиш.

6.2. Финансылык каражаттардын транштарын берүүнү тариздеген кошумча макулдашуулар, ошондой эле ушул Макулдашууга карата башка өзгөртүүлөр жана толуктоолор Тараптар аларга кол койгондон кийин юридикалык күчкө ээ болот жана ушул Макулдашуунун ажырагыс бөлүгү болуп саналат.

6.3. Ушул Макулдашууга каалаган өзгөртүүлөр жана толуктоолор, алар жазуу жүзүндө таризделсе жана Тараптардын ыйгарым укуктуу өкүлдөрү кол койгон учурда гана күчүнө кирет.

6.4. Банктын ушул Макулдашуу боюнча өз укуктарын жана милдеттенмелерин Фонддун жазуу жүзүндөгү макулдугусуз башка жакка толугу менен же жарым-жартылай кайра өткөрүп берүүгө укугу жок.

6.5. Ушул Макулдашуунун шарттарын аткаруудан бир тараптуу баш тартууга толук же жарым-жартылай жол берилбейт.

6.6. Эгерде Тараптардын бири өзүнүн почта, байланыш же төлөм реквизиттерин өзгөртсө, анда ал бул өзгөртүүлөр күчүнө киргенге чейин экинчи Тарапка бул тууралуу жазуу жүзүндө маалымдоого милдеттүү. Болбосо, почта реквизиттеринин өзгөргөндүгү жөнүндө кабарлабаган Тарапка жиберилген бардык кат-кабарлар, кат-кабар жөнөтүүчү Тарап алуучу Тараптын акыркы белгилүү болгон почта реквизиттери боюнча тапшыргандыгы жөнүндө билдирүү менен заказдык кат аркылуу кат-кабарды жөнөткөндүгүн ырастаган шартта талаптагыдай түрдө ошол Тарапка жеткирилди деп эсептелет.

6.7. Ушул Макулдашуу бирдей юридикалык күчкө ээ болгон эки нускада, Тараптардын ар бири үчүн бирден нускада түзүлдү.

7. Тараптардын реквизиттери жана кол тамгалары

7.1. Тараптардын юридикалык даректери жана реквизиттери:

7.2. Кол коюлган датасы жана жери, Тараптардын ар биринин кол койгон адамдарынын аты-жөнү, Тараптардын мөөрлөрү.

Кыргыз Республикасынын региондорун өнүктүрүү фонддорунун ишине мониторинг жүргүзүүнүн жана баалоонун ТИПТҮҮ МЕТОДИКАСЫ

1-глава. Жалпы жоболор

1. Ушул Типтүү методикада колдонулуучу түшүнүктөр:

1) индикатор - кандайдыр бир натыйжага же таасирге жетишүү даражасын мүнөздөгөн көрсөткүч;

2) мониторинг - белгиленген пландарды аткаруунун жүрүшүн көзөмөлдөө жана иш жүзүндөгү аракеттердин/натыйжалардын белгиленген стандарттарга же ченемдерге ылайык келишин текшерүү үчүн маалыматтарды топтоонун жана талдоонун үзгүлтүксүз процесси;

3) баалоо - убакыттын өтүшү менен кубулуштардын же көрсөткүчтөрдүн натыйжалуулугун, таасирин жана туруктуулугун талдоонун натыйжасы.

2. Типтүү методиканын максаты Фонддордун дирекцияларына жана Фонддордун Байкоочу кеңештерине уюмдун ишине жана ишке ашырылган долбоорлорго натыйжалуу мониторинг жүргүзүүгө жана баалоого жардам көрсөтүү болуп саналат. Типтүү методика ошондой эле Фонддордун Типтүү жободо көрсөтүлгөн мониторинг жүргүзүү жана баалоо (мындан ары - МБ) боюнча талаптарды аткаруусун камсыз кылат.

3. Фонддун дирекциясы ар жылдык негизде, отчеттук жылдан кийинки жылдын 1-апрелинен кечиктирбестен, МБнын жыйынтыгы боюнча отчетторду түзөт жана экономикалык болжолдоо боюнча ыйгарым укуктуу мамлекеттик органга жана бюджетти болжолдоо жана аткаруу боюнча ыйгарым укуктуу мамлекеттик органга жөнөтөт.

2-глава. Мониторинг жүргүзүү жана баалоо системасын уюштуруу

4. Фонддун дирекциясы Типтүү методиканын негизинде өзүнүн мониторинг жүргүзүү жана баалоо методикасын иштеп чыгат, ал Фонддун Байкоочу кеңешинин чечими менен бекитилет. Фонддун дирекциясынын сунушу боюнча Фонддун Байкоочу кеңеши Фонддун мониторинг тобунун курамын бекитет. Мониторинг тобунун сунушталган курамы:

1) Фонддун Байкоочу кеңешинин чечими менен мониторинг тобунун жетекчиси тарабынан дайындалуучу Фонддун Байкоочу кеңешинин өкүлү;

2) Фонддун уюштуруучусунун өкүлү;

3) Фонддун Байкоочу кеңешинин чечими менен мониторинг тобунун курамына берилген, мамлекеттик органдардын же жергиликтүү өз алдынча башкаруу органдарынын атынан Фонддун Байкоочу кеңешинин өкүлү;

4) Фонддун Байкоочу кеңешинин чечими менен мониторинг тобунун курамына берилген, коммерциялык же коммерциялык эмес уюмдардын атынан Фонддун Байкоочу кеңешинин өкүлү;

5) Фонддун аткаруучу директорунун буйругу менен мониторинг тобунун курамына берилген Фонддун дирекциясынын өкүлү.

5. Мониторинг тобунун мүчөлөрү Фонддун маалыматтарына жана документтерине эркин жетүүгө укуктуу.

6. Мониторинг тобунун жетекчиси мониторинг тобунун мүчөлөрүнө мониторинг жүргүзүү жана баалоо индикаторлорун чогултуу жана талдоо боюнча тапшырмаларды бөлүштүрөт.

7. Мониторинг тобу 31-декабрга чейинки мөөнөттө кийинки жылга мониторинг жүргүзүү жана баалоо планын иштеп чыгат.

8. Мониторингдин планы Фонддун аткаруучу директору тарабынан бекитилет. Мониторинг жүргүзүү жана баалоо планынын формасы ушул Типтүү методиканын 1-тиркемесинде берилген.

3-глава. Мониторинг жүргүзүүнүн жана баалоонун максаттары жана түрлөрү

9. Мониторинг жүргүзүүнүн жана баалоонун максаты - бөлүнгөн финансы каражаттарынын чегинде Фонддун ишине жана ишке ашырылган долбоорлорго коюлган максаттарга жетүү предметине реалдуу убакыт режиминде байкоо жана баалоо.

10. Мониторинг жүргүзүүнүн жана баалоонун негизги максаты - башкаруу чечимдерин кабыл алуу жөнүндө маалымат берүү. Маалымат жетиштүү, анык, өз убагында, ишенимдүү болушу керек.

11. Мониторинг "эмне болду?" жана "баштапкыларга же белгиленгендерге салыштырмалуу кандай четтөөлөр аныкталды (кырдаалды талдоосуз)?" деген суроолорго жооп берет.

Баалоо "натыйжаларга кантип жетишилди?", "эмне үчүн четтөөлөр пайда болду?" жана "каталарды кантип оңдоого болот (жагдайды талдоо менен)?" деген суроолорго жооп берет.

12. Типтүү жобонун талаптарына (Типтүү жобонун 7-главасы) ылайык МБнын төмөнкүдөй түрлөрү аныкталган:

1) Фонддун ишинин белгиленген эрежелерине жана жол-жоболорго ылайык келиши;

2) финансы каражаттарын максаттуу пайдаланууну сактоо;

3) долбоорлорду аткаруунун натыйжалуулугун баалоо;

4) Кыргыз Республикасынын бюджеттик мыйзамдарынын жол-жоболорун жана ченемдерин сактоо.

13. МБ системасын даярдоонун типтүү этаптары аныкталды (1-диаграмманы караңыз).

1-диаграмма. МБ системасын даярдоонун этаптары

14. Индикатор кандайдыр бир жетишкендиктерди өлчөө каражаты катары кызмат кылат. Ал Фонддун ишинин натыйжасында же долбоорду ишке ашырууда болуп жаткан өзгөрүүлөрдү чагылдырат. Индикатор максатка канчалык жеткендигине жооп берүүгө мүмкүндүк берет, башкача айтканда реалдуу натыйжаларды пландалгандар менен салыштырат.

15. МБ системасын түзүү үчүн индикаторлордун төмөнкүдөй түрлөрүн колдонуу сунушталат:

- процесстин индикаторлору - планда убактысы боюнча жана аткарылуу факты боюнча чагылдырылган белгилүү бир иш-аракеттер кандайча аткарылып жаткандыгы жөнүндө маалыматты чагылдырат,

- натыйжалардын индикаторлору - иш-аракет аяктагандан кийин же анын аралык этабында натыйжага жетишүү жөнүндө маалыматты чагылдырат;

- таасир этүүчү индикаторлор - субъекттин ишинин же кандайдыр бир долбоорду ишке ашыруунун натыйжасында белгилүү бир объектке тийгизген таасирди көрсөтөт.

16. Ушул Типтүү методиканын алкагында сандык жана сапаттык индикаторлор да колдонулат:

- сандык индикаторлор - сандык мүнөздөмөлөргө мониторинг жүргүзүү жана баалоо үчүн колдонулуучу индикаторлор, мисалы: бөлүнгөн каражаттардын көлөмү, долбоорлордун саны, карыздардын көлөмү;

- сапаттык индикаторлор - сапаттык мүнөздөмөлөрдү чагылдырат, мисалы: канааттануу, кабыл алуу, бир нерсеге мамиле кылуу даражасы.

17. Ар бир индикатор пландалган көрсөткүчкө салыштырмалуу бааланат. Пландык көрсөткүчтүн мааниси 100%га теңдештирилет. Индикатор иш жүзүндөгүнүн пландык көрсөткүчкө катышы катары бааланат. Индикаторлордун аталышы жана алардын пландуу маанилери бардык Фонддор үчүн бирдей болуп саналат.

18. Индикаторлордун ар бир тобу боюнча орточо мааниси эсептелет. 1-таблицада индикаторлорго баалоо жүргүзүүнүн мисалы келтирилген.

1-таблица. Фонддун ишинин белгиленген эрежелерге жана жол-жоболорго ылайык келүү индикаторлорунун тизмеги(*)

(*) Мисал.

3.1. Фонддун ишинин белгиленген эрежелерге жана жол-жоболорго ылайык келиши

19. Индикаторлор өтүнмө ээлери тарабынан Фонддун дарегине берилүүчү долбоорлорду кабыл алуу, баалоо, бекитүү, каржылоо боюнча жол-жоболордун Типтүү жободо көрсөтүлгөн жол-жоболорго ылайык келишин баалайт.

20. Сандык маанилерин, баалоо методдорун, маалымат булактарын, баалоонун мезгилдүүлүгүн көрсөтүү менен Фонд тарабынан жол-жоболордун сакталышын баяндаган индикаторлордун тизмеги 2-таблицада берилген.

21. Индикаторлордун ар бир тобу боюнча орточо мааниси эсептелет.

2-таблица. Фонддун ишинин белгиленген эрежелерге жана жол-жоболорго ылайык келүү индикаторлорунун тизмеси

3.2. Финансы каражаттарын максаттуу пайдаланууну сактоо

22. Индикаторлор Фонддун жана долбоорду аткаруучулардын Каржылоо планына жана долбоордун иш планына ылайык долбоорду каржылоону камсыз кылуу жөндөмдүүлүгүн жана жоопкерчилигин баалайт.

23. Финансылык каражаттардын максаттуу пайдаланылышын баяндаган индикаторлордун тизмеги 3-таблицада келтирилген.

3-таблица. Финансы каражаттарын максаттуу пайдаланууну сактоонун индикаторлорунун тизмеги

3.3. Долбоорду аткаруунун натыйжалуулугун баалоо

24. Индикаторлор бекитилген бюджеттердин алкагында бүткөрүлгөн долбоорлордун максаттарына жана милдеттерине жетишүүнү баалайт.

25. Долбоорлорду аткаруунун натыйжалуулугун баалоо индикаторлору 4-таблицада келтирилген.

4-таблица. Долбоорлорду аткаруунун натыйжалуулугун баалоо индикаторлору

3.4. Кыргыз Республикасынын бюджеттик мыйзамдарынын жол-жоболорун жана ченемдерин сактоо

26. Индикаторлор бюджеттик мыйзамдардын ченемдерин, анын ичинде мамлекеттик сатып алуулардын жол-жоболорун сактоого карата Фонддордун жана долбоорлордун аткаруучуларынын тартибин, жоопкерчилигин баалайт.

5-таблица. Кыргыз Республикасынын бюджеттик мыйзамдарынын жол-жоболорун жана ченемдерин сактоонун индикаторлору

4-глава. Фонддун иши жөнүндө статистикалык маалымат

27. Фонддун дирекциясы жылына 1 жолудан кем эмес, отчеттук жылдын 1-апрелинен кечиктирбестен, Фонддун иши жөнүндө статистикалык маалыматты экономикалык болжолдоо боюнча ыйгарым укуктуу мамлекеттик органга берет.

Статистикалык маалыматтардын тизмеги ушул Типтүү методиканын 3-тиркемесинде берилген.

5-глава. Мониторинг жүргүзүүнүн жана баалоонун жыйынтыктары боюнча отчеттор

28. Мониторинг жүргүзүүнүн натыйжалары отчет түрүндө таризделет, мында мониторингдин натыйжалары жана четтөөлөрдү жоюу боюнча сунуштамалар чагылдырылат. Мониторингдик топтун отчету Фонддун Байкоочу кеңешинин жыйналыштарында жылына 2 жолудан кем эмес угулат.

Мониторинг жүргүзүүнүн жана баалоонун натыйжалары жөнүндө Фонддун отчету ар жылдык негизде, отчеттук жылдан кийинки жылдын 1-апрелинен кечиктирбестен, экономикалык болжолдоо боюнча ыйгарым укуктуу мамлекеттик органга, ошондой эле бюджетти болжолдоо жана аткаруу боюнча ыйгарым укуктуу мамлекеттик органга жөнөтүлөт.

Отчеттун сунушталган форматы ушул Типтүү методиканын 4-тиркемесинде берилген.

Мониторинг жүргүзүүнүн жана баалоонун натыйжаларын визуализациялоо үчүн Excel программасынын негизинде "желекче" диаграммасын колдонуу сунушталат.

6-таблица. Мониторинг жүргүзүүнүн жана баалоонун натыйжалары(*)

(*) Мисал

Сүрөттүн графикалык көчүрмөсүн караңыз.

Региондорду өнүктүрүү фондунун ишине мониторинг жүргүзүү жана баалоо ПЛАНЫ

Региондорду өнүктүрүү фонддорунун ишинин натыйжалуулугун баалоонун сапаттык индикаторлоруна мониторинг жүргүзүү жана баалоо МЕТОДИКАСЫ

1. Методика Фонддун ишин мүнөздөгөн 2 сапаттык индикаторго мониторинг жүргүзүү жана баалоо үчүн иш-аракеттердин ырааттуулугун аныктайт:

1) жергиликтүү өз алдынча башкаруу органдарынын жана мамлекеттик органдардын Фонддун ишине канааттануу даражасы;

2) ишке ашырылган долбоорлордун натыйжалары менен акыркы колдонуучулардын канааттануу даражасы.

2. Баалоо анкеталоо методу менен жүргүзүлөт. Анкеталар сурамжылоонун катышуучуларына электрондук почта боюнча, мобилдик телефон боюнча, WhatsApp боюнча электрондук билдирүү аркылуу жөнөтүлөт.

3. Баалоо үстүбүздөгү жылдан кийинки жылдын январь-февраль айларында жүргүзүлөт. Баалоо боюнча маалыматтар отчеттук жылдан кийинки жылдын 31-мартына чейин даяр болушу жана жыйынтыктоочу отчетко киргизилиши керек.

4. Фонддорго баалоо жүргүзүү үчүн сурамжылоолорду жүргүзүү жана отчетторду даярдоо боюнча тажрыйбасы бар көз карандысыз компанияны жалдоо сунушталат. Компаниянын ишин каржылоо консалтингдик кызмат көрсөтүүлөрдү каржылоонун алкагында Фонддун бюджетинен же эл аралык донордук уюмдардын колдоосунун эсебинен жүзөгө ашырылышы мүмкүн.

5. Жергиликтүү өз алдынча башкаруу органдарынын жана мамлекеттик органдардын Фонддун ишине канааттануу даражасын баалоо:

1) Фонддун каражаттарынын эсебинен каржылоого өтүнмө берген жетекчилерди же долбоор үчүн жооптуу адамдарды көрсөтүү менен мамлекеттик органдар жана жергиликтүү өз алдынча башкаруу органдары түрүндөгү өтүнмө ээлеринин тизмеги түзүлөт;

2) ар бир жетекчи же жооптуу адам боюнча байланыш маалыматтары белгиленет: электрондук почта, же мобилдик телефондун номери;

3) байланыш маалыматтары боюнча сурамжылоо менен анкета жөнөтүлөт. Анкеталар дарек ээлерине отчеттук жылдан кийинки жылдын 1-февралынан кечиктирилбестен жөнөтүлөт;

1-таблица. Сурамжылоо анкетасы

4) жооптор келип түшкөнүнө жараша анкеталарга Excel таблицаларына жазылат. Жооптор отчеттук жылдан кийинки жылдын 1-мартынан кечиктирбестен кабыл алынат. Анкеталарга берилген жооптордун саны жиберилген анкеталардын санынын 70%ынан кем эмес болушу керек;

5) анкетага жоопторду кабыл алуу аяктагандан кийин Фонддун ишине ЖӨБ органдарынын жана мамлекеттик органдардын канааттануу даражасынын индикаторунун баасынын орточо мааниси төмөнкүдөй формула боюнча эсептелет:

мында:

Оср - индикатордун орточо мааниси (%),

ΣOi - бардык алынган жооптордун салмагынын суммасы (%),

Na - анкетага алынган жооптордун саны.

Excel таблицасын колдонуунун мисалы:

6. Ишке ашырылган долбоорлордун натыйжалары менен акыркы колдонуучулардын канааттануу даражасын баалоо:

1) отчеттук жылы ишке ашырылган долбоорлордун тизмегинен долбоорлордун 30%ы тандалып алынат, тандалып алынган долбоорлордун арасында экономикалык долбоорлор 20%дан кем эмес болушу керек (долбоорлор кокус тандоо принциби боюнча тандалат, чүчүкулак колдонууга жол берилет);

2) ар бир долбоор боюнча бул долбоордон пайда алган, байланыш маалыматтары менен 3-5 адам аныкталат, жогоруда аталган адамдар баалоо жүргүзгөн компания тарабынан кокус тандоо жолу менен тандалат (келечектеги анкеталануучулардын тизмеги долбоордун жетекчилиги кызыкдар адам катары көрсөтүүсүнө жол берилбейт);

3) байланыш маалыматтары боюнча сурамжылоо менен анкета жөнөтүлөт (анкеталар отчеттук жылдан кийинки жылдын 1-февралынан кечиктирилбестен дарек ээлерине жөнөтүлөт);

2-таблица. Сурамжылоо анкетасы

4) жооптор келип түшкөнүнө жараша анкеталарга Excel таблицаларына жазылат (жооптор отчеттук жылдан кийинки жылдын 1-мартынан кечиктирилбестен кабыл алынат);

5) анкетага жоопторду кабыл алуу аяктагандан кийин акыркы керектөөчүлөрдүн канааттануу даражасынын индикаторунун баасынын орточо мааниси төмөнкүдөй формула боюнча эсептелет:

 ,

мында:

Оср - индикатордун орточо мааниси (%),

ΣOi - бардык алынган жооптордун салмагынын суммасы (%),

Na - анкетага алынган жооптордун саны.

Excel таблицасын колдонуунун мисалы:

Региондорду өнүктүрүү фондунун иши жөнүндө СТАТИСТИКАЛЫК МААЛЫМАТ

1-таблица. Региондорду өнүктүрүү фонддорунун иши жөнүндө жыйынтыкталган маалымат

2-таблица. Регионду өнүктүрүү фонду ишке ашырган долбоорлордун баяндамасы

Регионду өнүктүрүү фондунун ишине мониторинг жүргүзүү жана баалоо боюнча ОТЧЕТТУН ФОРМАСЫ

1. Жалпы маалымат (1 беттен көп эмес)

- Фонд тууралуу маалымат;

- бюджет боюнча пландык көрсөткүчтөр;

- Фондду каржылоо булактары: ишканалар (жер казынасын пайдалануучулар), республикалык бюджеттин каражаттары, атайын каражаттар;

- келип түшкөн өтүнмөлөрдүн жалпы саны жана алардын иштин түрлөрү боюнча бөлүштүрүлүшү.