КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2013-жылдын 30-майы № 302

Айыл аймактарынын жана шаарлардын жергиликтүү бюджеттеринен каржылануучу билим берүү уюмдарын Кыргыз Республикасынын Билим берүү жана илим министрлигинин аймактык бөлүмдөрү аркылуу республикалык бюджеттен каржылоого которуу жөнүндө

(Кыргыз Республикасынын Өкмөтүнүн 2014-жылдын 5-июнундагы № 315, 2014-жылдын 29-декабрындагы № 745, 2015-жылдын 8-майындагы № 281, 2015-жылдын 13-июлундагы № 482, 2017-жылдын 18-сентябрындагы № 586, 2017-жылдын 28-декабрындагы № 843, 2018-жылдын 24-июлундагы № 342, Кыргыз Республикасынын Министрлер Кабинетинин 2021-жылдын 15-ноябрындагы № 264, 2022-жылдын 30-мартындагы №181, 2023-жылдын 13-декабрындагы № 675, 2026-жылдын 29-январындагы № 34  токтомдорунун редакцияларына ылайык)

"Билим берүү жөнүндө" Кыргыз Республикасынын Мыйзамынын 43 жана 44-беренелерине ылайык, жалпы билим берүү уюмдарын бюджеттик каржылоонун ченемдеринин негизинде билим берүү секторунда мамлекеттик чыгымдарды башкаруу тутумун андан ары өркүндөтүү жана финансылык ресурстарды натыйжалуу пайдаланууну камсыздоо максатында Кыргыз Республикасынын Өкмөтү токтом кылат:

(КР Өкмөтүнүн 2018-жылдын 24-июлундагы № 342 токтомунун редакциясына ылайык)

ТОКТОМ КЫЛАТ:

1. Бишкек шаарынын билим берүү уюмдарын кошпогондо, айыл аймактарынын жана шаарлардын жергиликтүү бюджеттеринен каржылануучу мамлекеттик билим берүү уюмдарынын окуу жана тарбия процесстерин камсыздоого чыгымдарды каржылоо 2013-жылдын 1-августунан тартып Кыргыз Республикасынын Билим берүү жана илим министрлигинин райондук жана шаардык бөлүмдөрүнүн (башкармалыктарынын) борбордоштурулган бухгалтериялары аркылуу республикалык бюджеттен каржылоого которулсун.

2. Төмөнкү тиркелгендер бекитилсин:

- Райондук (шаардык) билим берүү бөлүмүнүн (башкармалыгынын) борбордоштурулган бухгалтерияларынын типтүү штаттары;

- (бешинчи абзац КР Өкмөтүнүн 2015-жылдын 8-майындагы № 281 токтомуна ылайык күчүн жоготту);

- Ченемдик каржылоонун механизми жайылтылбаган Кыргыз Республикасынын жалпы билим берүүчү уюмдарынын тизмеги.

(КР Өкмөтүнүн 2014-жылдын 5-июнундагы № 315, 2015-жылдын 8-майындагы № 281, 2018-жылдын 24-июлундагы № 342 токтомдорунун редакцияларына ылайык)

3. (Кыргыз Республикасынын Министрлер Кабинетинин 2023-жылдын 13-декабрындагы № 675 токтомуна ылайык күчүн жоготту)

4. (КР Министрлер Кабинетинин 2021-жылдын 15-ноябрындагы № 264 токтомуна ылайык күчүн жоготту)

5. Кыргыз Республикасынын Өкмөтүнүн 2011-жылдын 20-сентябрындагы N 563 "Кыргыз Республикасынын жалпы билим берүү уюмдарын каржылоонун жан башына принцибине которуу жөнүндө" токтомуна төмөнкү өзгөртүүлөр киргизилсин:

аталышында жана бүткүл текст боюнча "жан башына" деген сөздөр тиешелүү жөндөмөдө "ченемдик" деген сөзгө алмаштырылсын;

- 1-пунктунда:

1-пунктунун экинчи жана үчүнчү абзацтары күчүн жоготту деп табылсын;

1-пунктунун төртүнчү жана бешинчи абзацтары 2013-жылдын 1-августунан тартып күчүн жоготту деп табылсын;

- 5-пункту күчүн жоготту деп табылсын;

- жогоруда аталган токтом менен бекитилген Жалпы билим берүүчү уюмдарда кошумча билим берүү кызматтары жөнүндө жободо:

бүткүл текст боюнча "жан башына" деген сөздөр тиешелүү жөндөмөдө "ченемдик" деген сөзгө алмаштырылсын;

- жогоруда аталган токтом менен бекитилген Ош, Жалал-Абад, Нарын жана Талас облустарынын, Бишкек жана Ош шаарларынын жалпы билим берүүчү уюмдарын бюджеттик каржылоонун жан башына принцибине которуу графигинде:

аталышында "жан башына" деген сөздөр "ченемдик" деген сөзгө алмаштырылсын;

3 жана 4-пункттарындагы "2012" цифралары "2013" цифраларына алмаштырылсын.

6. Төмөнкүлөр белгиленсин:

- Кыргыз Республикасынын Билим берүү жана илим министрлиги аркылуу республикалык бюджеттен төмөнкүлөр каржыланат:

коммуналдык кызмат көрсөтүүлөргө, имараттарды жана жайларды күтүүгө чыгымдардан тышкары мамлекеттик жалпы билим берүүчү уюмдардын чыгымдары:

райондук (шаардык) билим берүү бөлүмдөрүнүн (башкармалыктарынын) алдындагы борбордоштурулган бухгалтерияларынын райондук (шаардык) билим берүү бөлүмдөрүнүн (башкармалыктарынын) жана методикалык иштердин чыгымдары;

мектепке чейинки, мектептен тышкары жана башка билим берүү уюмдарынын эмгек акы төлөө фонду боюнча чыгымдары;

- мектепке чейинки, мектептен тышкаркы жана башка билим берүү уюмдарынын эмгек акысын жана Кыргыз Республикасынын Социалдык фондуна чегерүүлөрдөн башка жалпы билим берүүчү уюмдардын коммуналдык кызмат көрсөтүүлөрүн жана имараттар менен жайларды күтүү чыгымдарын, ошондой эле бардык чыгымдарын каржылоо функциясы жергиликтүү өз алдынча башкаруу органдарында сакталат;

- ушул токтомдун 2-пункту менен бекитилген Кыргыз Республикасынын жалпы билим берүүчү уюмдарынын чыгымдарын түзүүнүн жана аткаруунун тартиби 2013-жылдын 1-августунан тартып күчүнө кирээри;

- (КР Өкмөтүнүн 2018-жылдын 24-июлундагы № 342 токтомуна ылайык күчүн жоготту)

- жалпы билим берүү уюмдарын бюджеттик каржылоонун типтүү ченемдерин кийинки жылдарга кабыл алууга чейин ушул токтомдун 2-пункту менен бекитилген жалпы билим берүү уюмдарын бюджеттик каржылоонун стандарттарынын шкаласы колдонулаары;

- ушул токтомдун 2-пункту менен бекитилген Ченемдик каржылоонун механизми жайылтылбаган жалпы билим берүү уюмдарынын тизмеги Ош, Жалал-Абад, Нарын жана Талас облустарынын жалпы билим берүү уюмдарын бюджеттик каржылоонун ченемдик принцибине которууга жараша толукталаары;

- Кыргыз Республикасынын Билим берүү жана илим министрлигинин борбордук аппаратына жана райондук (шаардык) билим берүү бөлүмдөрүнүн (башкармалыктарынын) борбордоштурулган бухгалтерияларына киргизилген кызмат орундарын кармоого финансылык чыгымдар "Билим берүү" бөлүмү боюнча каралган каражаттардын, ошондой эле ушул токтомдун 3-пунктуна ылайык республикалык бюджеттин трансферттеринин эсебинен кармалган жергиликтүү өз алдынча башкаруу органдарында кыскартуунун натыйжасында бошотулуучу кызмат орундарынын чегинде ишке ашырылаары.

(КР Өкмөтүнүн 2014-жылдын 5-июнундагы № 315, 2014-жылдын 29-декабрындагы № 745, 2017-жылдын 18-сентябрындагы № 586, 2018-жылдын 24-июлундагы № 342 токтомдорунун редакцияларына ылайык)

6¹. Республикалык бюджеттен дотация албаган жергиликтүү өз алдынча башкаруу органдарына жергиликтүү бюджеттин каражаттарын мектепке чейинки билим берүүчү уюмдарды каржылоого, анын ичинде айлык акы фонду боюнча чыгымдарга жумшоо сунушталсын.

(КР Өкмөтүнүн 2015-жылдын 13-июлундагы № 482 токтомунун редакциясына ылайык)

7. Кыргыз Республикасынын Финансы министрлиги белгиленген тартипте "Кыргыз Республикасынын 2013-жылга республикалык бюджети жана 2014-2015-жылдарга болжол жөнүндө" Кыргыз Республикасынын Мыйзамына өзгөртүүлөрдү жана толуктоолорду киргизүү тууралуу мыйзам долбоорун киргизсин.

8. Кыргыз Республикасынын Билим берүү жана илим министрлиги:

а) 2013-жылдын 1-июлуна чейинки мөөнөттө:

- Кыргыз Республикасынын Өкмөтүнүн 2012-жылдын 20-февралындагы N 119 "Кыргыз Республикасынын Билим берүү жана илим министрлиги жөнүндө" токтому менен бекитилген Кыргыз Республикасынын Билим берүү жана илим министрлиги жөнүндө жобого өзгөртүүлөрдү жана толуктоолорду киргизүүнү караган токтом долбоорун Кыргыз Республикасынын Өкмөтүнүн бекитүүсүнө киргизсин;

- ушул токтомдун 2-пункту менен бекитилүүчү Райондук (шаардык) билим берүү бөлүмүнүн (башкармалыгынын) борбордоштурулган бухгалтерияларынын типтүү штаттарына ылайык райондук (шаардык билим берүү бөлүмдөрүнүн (башкармалыктарынын) борбордоштурулган бухгалтерияларынын штаттык саны бекитилсин:

б) 2013-жылдын 1-июнуна чейинки мөөнөттө райондук (шаардык) билим берүү бөлүмдөрүнүн (башкармалыктарынын) борбордоштурулган бухгалтерияларын комплектесин;

в) 2013-жылдын 1-июнуна чейинки мөөнөттө билим берүү уюмдарын каржылоо маселелерине райондук (шаардык) билим берүү бөлүмдөрүнүн (башкармалыктарынын) кызматкерлерин окутсун;

г) ушул токтомдон келип чыккан уюштуруучулук жана башка чараларды көрсүн.

9. Кыргыз Республикасынын эмгек мыйзамдарына ылайык бошотулган кызматкерлерди ишке орноштуруу боюнча чараларды көрүү айыл аймактарынын жергиликтүү өз алдынча башкарууларынын аткаруу органдарына жана Кыргыз Республикасынын Билим берүү жана илим министрлигине сунушталсын.

11. Бул токтомдун аткарылышын контролдоо Кыргыз Республикасынын Өкмөтүнүн Аппаратынын билим берүү, маданият жана спорт бөлүмүнө жүктөлсүн.

12. Бул токтом расмий жарыяланган күндөн тартып күчүнө кирет.

Райондук (шаардык) билим берүү бөлүмдөрүнүн (башкармалыктарынын) борбордоштурулган бухгалтерияларынын ТИПТҮҮ ШТАТТАРЫ

(КР Өкмөтүнүн 2014-жылдын 5-июнундагы № 315, КР Министрлер Кабинетинин 2022-жылдын 30-мартындагы №181 токтомунун редакциясына ылайык)

Эскертүү:

1. Борбордоштурулган бухгалтериялардын кызматкерлеринин чектик штаттык саны ушул штаттык ченемдерге жараша эсептелет жана Кыргыз Республикасынын Билим берүү жана илим министрлиги тарабынан бекитилет.

Эгерде тейленүүчү уюмдарда кызматкерлердин саны белгиленген ченемдерден көп же аз болсо, анда борборлоштурулган бухгалтериялардын штаттык кызмат орундарынын саны пропорционалдуу түрдө көбөйтүлөт же азайтылат. Мында, борборлоштурулган бухгалтериянын штаттык санын эсептөө бүтүн сандын 0,25ке(1) эселүү болгон жүздүк үлүштөгү маанисине чейин тегеректөө эрежеси менен жүргүзүлөт.

1-мисал. Райондун билим берүү уюмдарында 1759 адам иштейт. Бул учурда бухгалтерлердин штаттык кызмат ордунун санын эсептөө төмөнкү түрдө жүргүзүлөт:

1759

------- = 8,795 ≈ 8,75 кызмат орду.

200

2-мисал. Шаардын билим берүү уюмдарында 868 адам иштейт. Бухгалтерия кызматкерлеринин саны:

868

----- = 4,340 ≈ 4,25 кызмат орду.

200

2. Борборлоштурулган бухгалтериянын кызматкерлеринин штаттык саны 25 кызмат ордунан ашпашы керек.

2-1. Кароолчунун кызматы борбордоштурулган бухгалтериялардын жумуш убагын кошпогондо сменада 1 бирдик эсебинде дем алыш жана майрам күндөрүндөгү ишин эске алуу менен киргизилет.

2-2. Жеңил автомобиль айдоочунун штаты жеңил автомобили бар болсо киргизилет.

2-3. Кызматтык жайларды тазалоочу жана от жагуучу штаттык бирдиги Кыргыз Республикасынын Өкмөтүнүн 2011-жылдын 11-октябрындагы № 627 "Кенже жана техникалык тейлөөчү кызматкерлердин убактысынын, ишинин, санынын типтүү ченемдерин бекитүү жөнүндө" токтомуна ылайык белгиленет.

3. Тейлөөчү уюмдардын өзгөчөлүгүн эске алуу менен борбордоштурулган бухгалтериялардын кызматкерлеринин жалпы санынын чегинде кызмат орундарынын аталышы өзгөрүшү мүмкүн.

4. Жергиликтүү бюджеттердин каражаттарынан билим берүү уюмдарынын чыгымдарын каржылоо жүктөлгөн шаардык билим берүү бөлүмдөрүнүн  (башкармалыктарынын) борбордоштурулган бухгалтерияларынын штатына жергиликтүү бюджеттердин каражаттарынын эсебинен жалпы билим берүүчү уюмдардын 130 класска 1 кызмат эсебинде жана мектепке чейинки билим берүү уюмдарында 22 топко 1 кызмат эсебинде бухгалтерлердин штаттык кызматы кошумча киргизилиши мүмкүн.

(1) 3 бирдик, 3,25 бирдик, 3,75 бирдик ж.б.у.с.

(КР Өкмөтүнүн 2014-жылдын 5-июнундагы № 315 токтомунун редакциясына ылайык)

2013-жылдын шарттарында Кыргыз Республикасынын жалпы билим берүүчү уюмдарын бюджеттик каржылоо стандарттарынын шкаласы (коммуналдык чыгымдарсыз)

 (КР Өкмөтүнүн 2018-жылдын 24-июлундагы № 342 токтомуна ылайык күчүн жоготту)

Ченемдик каржылоонун механизми жайылтылбаган Кыргыз Республикасынын жалпы билим берүү уюмдарынын ТИЗМЕГИ

(КР Өкмөтүнүн 2015-жылдын 8-майындагы № 281, 2017-жылдын 28-декабрындагы № 843 токтомдорунун редакцияларына ылайык)